G7 давлатлари 2023 йилда Украинага 39 миллиард доллар юборади
Буюк Британия, Германия, Италия, Канада, Франция, Япония ва АҚШни ўз ичига олган Катта еттилик давлатлари Украинага 39 миллиард доллар молиявий ёрдам жўнатиш ниятида эканликларини маълум қилди. Бу ҳақда “Коммерсант” хабар бермоқда.
Қарор Ҳиндистоннинг Бангалор шаҳрида бўлиб ўтган Катта еттилик мамлакатлари молия вазирликлари ва марказий банклари раҳбарларининг йиғилиши якунлари бўйича қабул қилинди.
“Ушбу қўллаб-қувватлаш Украинага ишонч бағишлайди ва ҳокимиятга давлат фаолиятини кафолатлаш, асосий хизматларни кўрсатишни давом эттириш, муҳим инфратузилмани таъмирлаш ва иқтисодиётни барқарорлаштириш имконини беради”, — дейилади Япония Молия вазирлиги сайтида чоп этилган қўшма баёнотда.
Баёнотда ташкилот мамлакатлари томонидан Украинани қўллаб-қувватлаш бўйича бошқа чора-тадбирлар, жумладан, қурол-яроғ етказиб бериш, украиналик ҳарбийларни ўқитиш ва гуманитар ёрдам кўрсатилган.
Япония молия вазири Шуничи Сузуки йиғилишдан сўнг журналистларга “Катта еттилик” давлатлари ҳам кейинги чекловлар тўғрисида қарор қабул қилиш учун Россияга қарши санкциялар самарадорлигини таҳлил қилишлари кераклигини айтди.
Россия ва Украина ўртасида уруш бошланганидан кейин G7 давлатлари Украинага мунтазам равишда молиявий ёрдам ва қурол-яроғ жўнатиб турди.
20 февраль куни 2023 йилда G7 га раислик қиладиган Япония Украинага 5,5 миллиард доллар ёрдам бериши маълум бўлди.
АҚШ Киевга камида 13 миллиард доллар ажратди. Катта еттилик ташқи ишлар вазирлари Россияга нисбатан санкциялар босимини оширишга ваъда беришди.
