Yo‘l belgilarini bo‘yashga 1,7 mlrd, o‘quv maydonchasi uchun 1,6 mlrd so‘m; familiyasi, telefon raqami, manzili bir raqobatchilar — 22-yanvar tenderlari haqida

22-fevral kuni O‘zbekiston Respublikasi Tovar-xom ashyo birjasida 100 dan ortiq tenderlar amalga oshirildi. “Daryo” muxbiri hujjatlarni monitoring qilib, eng e’tiborga molik savdolar haqida ma’lumot beradi.

Bir xil familiyali raqobatchilar

Zomin davlat qo‘riqxonasi yovvoyi hayvonlar uchun beda pressi sotib olish boshlang‘ich qiymati 25 million so‘m bo‘lgan tender o‘tkazgan. Unda “Jizzax Xo‘jalik Mollari Savdosi” va “Mega Elektr Tovar” MCHJlar ishtirok etgan.

Komissiya a’zolarining yakuniy natijalariga ko‘ra, “Jizzax Xo‘jalik Mollari Savdosi” 97 ball bilan g‘olib, 90 ball yig‘gan “Mega Elektr Tovar” zaxira g‘olib deb topilgan.

G‘olib korxonaning rahbari va 100 foizlik ta’sischisi Soatova Matluba Haydarovna hisoblanadi. MCHJ Jizzax shahri “Uchariq” mahallasi Bo‘stonliq ko‘chasida joylashgan.

E’tiborlisi, “Mega Elektr Tovar” MCHJ rahbari Soatov To‘ychi. Tadbirkorlik subyekti Jizzax shahri “Uchariq mahallasi” Shokirov ko‘chasida joylashgan.

Tenderda raqobatchi sifatida qatnashgan ikki MCHJ rahbarlari bir familiyaga ega ekani, korxonalar bir mahallada joylashgani tasodifmi? Mas’ullardan izoh kutib qolamiz.

YHXXdan 3,3 mlrd so‘mlik xaridlar

Yo‘l harakati xavfsizligi xizmati 21-fevral kuni ikkita katta xaridni amalga oshirdi. Dastlab, davlat maktabgacha ta’lim muassasalari tarbiyalanuvchilari uchun o‘quv maydonchasi, o‘yinchoq belgilar va svetofor, chorrahalar, piyodalar yo‘lagi uchun tender o‘tkazdi.

Boshlang‘ich qiymati 1 milliard 785 million so‘m bo‘lgan tenderda ikkita MCHJ qatnashdi. Yakunda Sanny Group Inc MCHJ g‘olib deb topildi. Shartnoma summasi — 1 milliard 683 million so‘m.

Bundan tashqari, YHXX yo‘l belgilarini bo‘yashga mo‘ljallangan akril bo‘yoq sotib olish bo‘yicha ham boshlang‘ich qiymati 1 milliard 750 million so‘m bo‘lgan tender o‘tkazdi.

Unda Ultramax Road Build va Geo-Vista MCHJlar qatnashdi. Yakunda komissiya a’zolari Ultramax Road Build’ni g‘olib deb topdi. Shartnoma 1 milliard 699 million 600 ming so‘mga tuzildi.

Adresi, telefon raqami bir raqobatchilar

Guliston shahar tibbiyot birlashmasi bemorlarga ovqat yetkazib berish bo‘yicha tender o‘tkazdi. Tenderning boshlang‘ich qiymati — 75 million so‘m.

Unda ikkita tadbirkorlik subyekti ishtirok etdi. Hakamlarning yakuniy baholariga ko‘ra, “Bunyodkor Go‘sht Sut Ta’minot” MCHJ g‘olib, Sirdaryo Outsourcing Service MCHJ zaxira g‘olib deb topildi.

Ochiq ma’lumotlarga ko‘ra, tenderda raqobatchi bo‘lgan tadbirkorlik subyektlarining aloqa telefon raqamlari, shuningdek, joylashuv manzillari bir xil.