22 февраль куни Ўзбекистон Республикаси Товар-хом ашё биржасида 100 дан ортиқ тендерлар амалга оширилди. “Дарё” мухбири ҳужжатларни мониторинг қилиб, энг эътиборга молик савдолар ҳақида маълумот беради.
Бир хил фамилияли рақобатчилар
Зомин давлат қўриқхонаси ёввойи ҳайвонлар учун беда пресси сотиб олиш бошланғич қиймати 25 миллион сўм бўлган тендер ўтказган. Унда “Жиззах Хўжалик Моллари Савдоси” ва “Мега Электр Товар” МЧЖлар иштирок этган.
Комиссия аъзоларининг якуний натижаларига кўра, “Жиззах Хўжалик Моллари Савдоси” 97 балл билан ғолиб, 90 балл йиғган “Мега Электр Товар” захира ғолиб деб топилган.
Ғолиб корхонанинг раҳбари ва 100 фоизлик таъсисчиси Соатова Матлуба Ҳайдаровна ҳисобланади. МЧЖ Жиззах шаҳри “Учариқ” маҳалласи Бўстонлиқ кўчасида жойлашган.
Эътиборлиси, “Мега Электр Товар” МЧЖ раҳбари Соатов Тўйчи. Тадбиркорлик субъекти Жиззах шаҳри “Учариқ маҳалласи” Шокиров кўчасида жойлашган.
Тендерда рақобатчи сифатида қатнашган икки МЧЖ раҳбарлари бир фамилияга эга экани, корхоналар бир маҳаллада жойлашгани тасодифми? Масъуллардан изоҳ кутиб қоламиз.
ЙҲХХдан 3,3 млрд сўмлик харидлар
Йўл ҳаракати хавфсизлиги хизмати 21 февраль куни иккита катта харидни амалга оширди. Дастлаб, давлат мактабгача таълим муассасалари тарбияланувчилари учун ўқув майдончаси, ўйинчоқ белгилар ва светофор, чорраҳалар, пиёдалар йўлаги учун тендер ўтказди.
Бошланғич қиймати 1 миллиард 785 миллион сўм бўлган тендерда иккита МЧЖ қатнашди. Якунда Sanny Group Inc МЧЖ ғолиб деб топилди. Шартнома суммаси — 1 миллиард 683 миллион сўм.
Бундан ташқари, ЙҲХХ йўл белгиларини бўяшга мўлжалланган акрил бўёқ сотиб олиш бўйича ҳам бошланғич қиймати 1 миллиард 750 миллион сўм бўлган тендер ўтказди.
Унда Ultramax Road Build ва Geo-Vista МЧЖлар қатнашди. Якунда комиссия аъзолари Ultramax Road Build’ни ғолиб деб топди. Шартнома 1 миллиард 699 миллион 600 минг сўмга тузилди.
Адреси, телефон рақами бир рақобатчилар
Гулистон шаҳар тиббиёт бирлашмаси беморларга овқат етказиб бериш бўйича тендер ўтказди. Тендернинг бошланғич қиймати — 75 миллион сўм.
Унда иккита тадбиркорлик субъекти иштирок этди. Ҳакамларнинг якуний баҳоларига кўра, “Бунёдкор Гўшт Сут Таъминот” МЧЖ ғолиб, Sirdaryo Outsourcing Service МЧЖ захира ғолиб деб топилди.
Очиқ маълумотларга кўра, тендерда рақобатчи бўлган тадбиркорлик субъектларининг алоқа телефон рақамлари, шунингдек, жойлашув манзиллари бир хил.
Изоҳ (0)