“Vagner” asoschisi Yevgeniy Prigojin Afrika va Yaqin Sharqda o‘ziga aloqador neft, gaz, olmos va oltin qazib olish bilan shug‘ullanadigan kompaniyalar faoliyatidan 4 yilda 250 million dollarga foyda oldi. Bu haqda Financial Times jurnalistlari xabar berdi.
Surishtiruv materialida aytilishicha, bunday daromad, “Yevro polis”, “M invest” va “Merkuriy” kompaniyalarining 21-dekabr 2022-yilgacha bo‘lgan moliyaviy hisobotlarini tahlil qilish orqali aniqlangan. Prigojinga nisbatan 2016-yildan qo‘llanilgan sanksiyalar oligarxga Sudan, Suriya, Afrika va Osiyodan 100 millionlar ishlab topishga to‘sqinlik qilmagan. Xususan, jurnalistlar “Yevro polis” kompaniyasining hisobotiga e’tibor qaratgan.
AQSH hukumati 2018-yilda kompaniyaning Suriyadagi faoliyatiga qarshi sanksiyalar kiritgan. Hisoboti shuni ko‘rsatdiki, sanksiyalar cheklangan ta’sirga ega bo‘lgan, chunki 2020 -yilda “Yevro Polis” resurslarni 134 million dollarga sotishni davom ettirgan, sof foyda 90 million dollarni tashkil qilgan.
“Bu Rossiyaga qaytarilgan qo‘shma kapital rentabelligining 180 foizini tashkil etdi”, — deydi jurnalistlar.
Prigojinning boshqa kompaniyalari aylanmasi, masalan AQSH sanksiyasidagi Sudanda oltin qazib oluvchi "M Invest" ning konlari 2021-yilda 2,6 million dollar foyda oldi. Boshqa nomi keltirilmagan kompaniyalar Sudandagi korxonalarga va Vagner bilan bog‘liq katta hajmdagi sanoat uskunalarini jo‘natishi ortidan foydasi 6 million dollardan oshdi.
Suriyada neft va gaz sohasida faoliyat yurituvchi “Merkuriy” kompaniyasi 2021-yildan beri Yevropa Ittifoqi sanksiyalari cheklovlariga qaramay, uch yil ichida 67 million dollar daromad olishga muvaffaq bo‘lgan. Biroq, keyinchalik u "nol foyda" haqida hisobot berdi, deb yozadi Financial Times.
Nashr jurnalistlari hisobotda ko‘rsatilgan daromad rubldan dollarga amaldagi kurs bo‘yicha konvertasiya qilinganini ta’kidladi. Maqolada “Vagner” asoschisining Rossiyada topayotgan foydasi hisobga olinmagan.
Izoh (0)