“Дарё” нашри 22 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия ғалабага эришмасдан тўхтай олмайди, акс ҳолда у парчаланиши мумкин.
Агар АҚШ Россияни мағлуб этмоқчи бўлса, Москва ўзини ҳар қандай қурол, жумладан, ядровий қурол билан ҳимоя қилишга ҳақли, деди Россия Федерацияси Хавфсизлик кенгаши раиси ўринбосари Дмитрий Медведев.
“Стратегик ҳужум қуролларни қисқартириш бўйича АҚШ билан шартнома(“СНВ-3”)нинг тўхтатилиши (ҳозирча) шу билан боғлиқ. Ҳақиқатдан узилган АҚШ элитаси нима қилиб қўйгани ҳақида ўйлашсин. Биз бошқа ядровий кучлар — НАТО аъзолари: Франция ва Британиянинг ҳам муносабатини кузатяпмиз. АҚШ ва СССР (эндиликда Россия) ўртасидаги келишувларни тайёрлашда уларнинг стратегик ядро кучлари одатдаги ядро каллаклари ва ташувчилар балансига киритилмаган ва буни қилиш вақти келди”, — деб ёзди у Telegram-каналида.
Медведев Байденнинг “Россия Украинага ҳужумни тўхтаца, уруш тугайди, агар Украина Россиядан ўзини ҳимоя қилишни тўхтаца, Украина тамом бўлади”, — деган сўзларини эслади ва буни ўз версиясига ўгирди: “Агар Россия ғалабага эришмасдан ъСНВ-3ъни тўхтаца, Россия мавжуд бўлмайди, у парчаланади. Агар АҚШ Киев режимига қурол етказиб беришни тўхтаца, уруш тугайди
Эслатиб ўтамиз, Владимир Путин Россияда 2024 йилда бўлиб ўтадиган президентлик сайловларида қатнашиш ёки қатнашмаслиги ҳақида ҳозирча эълон қилмади.
21 февраль куни Путин Федерал Мажлисга мурожаат йўллар экан, 2024 йилда бўлиб ўтадиган президентлик сайловлари қатъий қонунларга мувофиқ, барча демократик ва конституциявий тартибларга риоя қилинган ҳолда ўтказилишини айтди.
Қонун бўйича Путин 2024 йилда янги президентлик муддати учун номзодини қўйиш ҳуқуқига эга.
Франция энергетика гиганти “Газпром”га қарши суд ишини бошлади
Франциянинг Engie энергетика компанияси узоқ муддатли шартномалар бўйича газ етказиб бериш мажбуриятларини бажарилмаганлиги сабаб “Газпром Экспорт” компаниясига қарши арбитраж ишини бошлади. Бу ҳақда “Интерфакс” хабар бермоқда.
Суд иши 2022 йилнинг тўртинчи чораги бошида бошланган. Engie шартнома бўйича жарималарни тўлашни ва “Газпром”нинг келишувларга риоя қилмаслиги натижасида кўрилган зарарни қоплашни талаб қилмоқда.
“Ушбу арбитраж процедураси 2022 йил июнь ойи ўрталарида “Газпром Экспорт”нинг Engie компаниясига етказиб беришдаги сезиларли танқислик билан боғлиқ, шундан сўнг 2022 йил ёзи охирида “Газпром Экспорт” томонидан томонлар ўртасидаги келишмовчиликлар туфайли Engie’га етказиб беришни қисқартириш бўйича бир томонлама қарор қабул қилинган”, — дейилади ҳужжатда.
Engie француз энергетика саноати гуруҳидир. Унинг асосий акциядори Франция давлати бўлиб, у капиталнинг 23,64 фоизига ва овоз бериш ҳуқуқининг 33,84 фоизига эга.
2022 йил 1 сентябрдан бошлаб “Газпром” июль ойидаги етказиб бериш учун тўлиқ тўланмагани учун Engieъга газ етказиб беришни тўхтатганди.
Ўрта Ер денгизида чўкиб кетган машхур кемага Ўзбекистоннинг қандай алоқаси бор?
“Титаник” Шимолий Атлантика океанида чўкиб кетишидан 2000 йил олдин Ўрта Ер денгизида Улубурун шарқий қирғоқларида кўплаб нодир металларни олиб кетаётган яна бир машҳур кема ҳалокатга учраган. Ҳодиса ҳақида маълум бўлган 1982 йилдан бери олимлар Улубурун кемаси ҳалокатининг тафсилотларини ўрганиб келади.
Яқинда бир гуруҳ олимлар, жумладан, Ст.Луисдаги Вашингтон университетининг санъат ва фанлар бўйича археология профессори Майкл Фрачетти ҳайратланарли топилмани аниқлади: кемада топилган қалайнинг тахминан учдан бир қисмини Марказий Осиёда ҳозирги Ўзбекистон ҳудудида яшаган тоғ чорвадорларининг кичик жамоалари ишлаб чиқарган ва етказиб берган — Ўрта Ер денгизи бўйлаб бозорларга ташилган қалайдан бронза металл ҳосил қилишда фойдаланилган.
30 ноябрь куни Science Advances журналида чоп этилган тадқиқот геокимёвий таҳлиллардаги ютуқлар туфайли амалга оширилган, унда юқори даражадаги аниқлик билан тадқиқотчилар милоддан аввалги давр кемасига ортилган қалайнинг бир қисми Ўзбекистон ҳудудидаги Мушистон конидан, қолган икки қисми қадимги Анатолиядаги яъни ҳозирги Туркиядаги Кестел конидан қазиб олинганини аниқлади.
Ўша даврда Ўрта Осиёнинг кончилик раёнларида йирик саноат маркази ёки империядан узоқда жойлашган тоғ чорвадорларининг кичик жамоалари яшаган. Эрон ва Месопотамия орқали ўтадиган икки жой орасидаги релеф қўпол эди, бу эса тонналаб оғир металларни ўтказишни жуда қийинлаштирарди.
“Афтидан, маҳаллий кончилар кенг халқаро тармоқларга кириш имконига эга бўлган ва қуруқликдаги савдо ва бошқа алоқа шакллари орқали мазкур жуда муҳим товарни Ўрта Ер денгизигача ўтказишга муваффақ бўлган”, — деди Фрачетти.
Коррупцияга қарши ўтказилган эхпертиза қонун ҳужжатларидаги коррупсион ҳолатларни аниқлай олмадими?
Ўзбекистонда 2022 йилда экспертизадан ўтказилган қонунчилик ҳужжатларининг 243 тасида 350 та коррупциявий омил аниқланди, деб хабар бермоқда Адлия вазирлиги.
Қайд этилишича, 2022 йил давомида ижтимоий ҳимоя, молия ва банк, тадбиркорлик, ташқи иқтисодий фаолият ҳамда божхона ишига оид 1 860 та қонунчилик ҳужжати коррупцияга қарши экспертизадан ўтказилган. Экспертиза натижаларига кўра, ҳужжатларда 350 та коррупциявий омил аниқланган.
Давлат органлари ва ташкилотлари томонидан 293 та лойиҳа коррупцияга қарши экспертизадан ўтказилган ва уларда коррупциявий омиллар аниқланмагани маълум қилинган. Лекин ушбу лойиҳалар Адлия вазирлиги томонидан экспертизадан ўтказилганда уларда 457 та коррупциявий омил аниқланган.
Ушбу ҳолатдан келиб чиқиб, “Коррупциядан холи қонунчилик”ни яратиш мақсадида 2026 йилгача амалдаги 21 мингга яқин қонунчилик ҳужжатлари коррупцияга қарши экспертизадан ўтказилиши айтилди.
Изоҳ (0)