Xitoy Ukrainadagi keskinlikning kuchayishi va uning “nazoratdan chiqib ketishi”dan qattiq xavotirda, ushbu mamlakatdagi vaziyat va Tayvan muammosini solishtirmaslik kerak. Bu haqda Xitoy tashqi ishlar vaziri Sin Gan “Global xavfsizlik tashabbusi: Xitoyning xavfsizlik dilemmasi yechimi” forumida aytib o‘tdi.
“Shu o‘rinda, biz tegishli davlatlarni olovga yog‘ sepishni darhol to‘xtatishga, Xitoyni ayblashni hamda ‘bugun — Ukraina, ertaga — Tayvan’ degan qichqiriqlarni bas qilishga chaqiramiz”, — dedi vazir.
Sin Gan Xitoy urush boshlanganidan beri xolislikka amal qilayotganini ishontirib aytdi. Unga ko‘ra, Pekin kelajakda tinchlik muzokaralariga ko‘maklashish, “siyosiy yechim uchun Xitoy donoligini baham ko‘rish” hamda muloqotni rivojlantirish uchun xalqaro hamjamiyat bilan ishlashni davom ettirish niyatida.
“Hozirda Xitoy tinch taraqqiyot yo‘liga sodiqlikni o‘z konstitutsiyasida mustahkamlab qo‘ygan dunyodagi yagona davlat”, — dedi Sin Gan.
Xitoy Tayvanni o‘z provinsiyasi deb hisoblaydi va AQSH rasmiylarining orolga tashriflarini uning Xitoydan mustaqil bo‘lishini qo‘llab-quvvatlash deb biladi. Xitoy Mudofaa vazirligi Tayvan uchun kurashishga tayyor ekanini bir necha bor ta’kidlagan, AQSH prezidenti Jo Bayden esa orolni harbiy yo‘l bilan himoya qilishga tayyorligi haqida gapirgan. AQSHning bir qancha amaldagi yuqori martabali harbiy amaldorlari vaziyat ikki kuch o‘rtasida bevosita urushga olib kelishi mumkinligidan ogohlantirgan.
Izoh (0)