G‘arb davlatlari va tashkilotlari Rossiya bosqini boshlanganidan keyin Ukrainaga 64 milliard yevro yuborishga va’da bergan, biroq 2022-yil oxiriga qadar Kiyev bu mablag‘ning yarmidan kamrog‘ini – 31 milliard yevroni olgan. Bu haqda Kil Jahon iqtisodiyoti instituti tomonidan o‘tkazilgan tadqiqot natijalariga tayanib, “RBK” xabar bermoqda.
Harbiy harakatlar boshlanganidan keyin mablag‘ning bir qismini ajratish uchun Yevropa Ittifoqiga siyosiy va huquqiy rozilik olishga olti oygacha vaqt kerak bo‘ldi, dedi institut tadqiqotchisi Kristofer Trebesh. Uning ta’kidlashicha, bunday kechikishlar harbiy to‘qnashuvning faol bosqichida, xarajatlar ko‘paygan va daromadlar kamaygan bir paytda “albatta muammo” bo‘ladi.
Tahlilchilarning xulosasiga ko‘ra, G‘arb davlatlari o‘tmishda shunga o‘xshash urushlar paytida kattaroq yordam mablag‘larini ajratgan. Ittifoqchilarning yordami 1990—1991-yillardagi Fors ko‘rfazi urushi paytida masalan Germaniya ulushida mamlakat yalpi ichki mahsulotining 0,5 foiziga teng bo‘lgan, bu Berlin Kiyevga va’da qilgan mablag‘dan deyarli uch baravar ko‘p.
“Men shu bilan solishtirganda qanchalik kichik ekaniga hayron bo‘ldim, chunki hozir o‘sha paytdagidan ancha boy va iqtisodiy jihatdan qudratliroqmiz. Agar istasak, ko‘proq ish qila olamiz”, — dedi Trebesh.
Yevropa Ittifoqi va Yevropa investitsiya banki 2022-yil davomida birgalikda 30 milliard yevroga yaqin mablag‘ ajratishga kelishib oldi, biroq bu mablag‘ning 17,5 milliard yevro qismi haligacha olinmagan, deydi tahlilchilar. Noyabr oyida Yevropa Ittifoqi to‘lov mexanizmini qayta ko‘rib chiqib, Ukrainani 2023-yilda “muntazam moliyaviy yordam” olishiga ishontirdi, hamda Kiyev oyiga taxminan 1,5 milliard yevro olishini kafolatladi.
Ukraina har oyda xorijiy hamkorlardan 3 milliard dollar olishi kerak, deb baholadi mamlakat Moliya vazirligi fevral oyida. Vazir o‘rinbosari Olga Zikovaning so‘zlariga ko‘ra, hukumat allaqachon budjet taqchilligini kamaytirish bo‘yicha tizimli ishlarni amalga oshirgan, AQSH va Yevropa Ittifoqi 2023-yilda 30 milliard dollarlik mablag‘ ajratishga tayyorligini tasdiqlagan.
“Biroq yana 10 milliard dollarga ehtiyoj qolmoqda. Bu yerda biz boshqa davlatlar va xalqaro moliya tashkilotlari, xususan, Xalqaro valyuta jamg‘armasi yordamiga umid qilamiz”, — deya qo‘shimcha qildi u.
Izoh (0)