Хитой Украинадаги кескинликнинг кучайиши ва унинг “назоратдан чиқиб кетиши”дан қаттиқ хавотирда, ушбу мамлакатдаги вазият ва Тайван муаммосини солиштирмаслик керак. Бу ҳақда Хитой ташқи ишлар вазири Цин Ган “Global хавфсизлик ташаббуси: Хитойнинг хавфсизлик дилеммаси ечими” форумида айтиб ўтди.
“Шу ўринда, биз тегишли давлатларни оловга ёғ сепишни дарҳол тўхтатишга, Хитойни айблашни ҳамда ‘бугун — Украина, эртага — Тайван’ деган қичқириқларни бас қилишга чақирамиз”, — деди вазир.
Цин Ган Хитой уруш бошланганидан бери холисликка амал қилаётганини ишонтириб айтди. Унга кўра, Пекин келажакда тинчлик музокараларига кўмаклашиш, “сиёсий ечим учун Хитой донолигини баҳам кўриш” ҳамда мулоқотни ривожлантириш учун халқаро ҳамжамият билан ишлашни давом эттириш ниятида.
“Ҳозирда Хитой тинч тараққиёт йўлига содиқликни ўз конституциясида мустаҳкамлаб қўйган дунёдаги ягона давлат”, — деди Син Ган.
Хитой Тайванни ўз провинцияси деб ҳисоблайди ва АҚШ расмийларининг оролга ташрифларини унинг Хитойдан мустақил бўлишини қўллаб-қувватлаш деб билади. Хитой Мудофаа вазирлиги Тайван учун курашишга тайёр эканини бир неча бор таъкидлаган, АҚШ президенти Жо Байден эса оролни ҳарбий йўл билан ҳимоя қилишга тайёрлиги ҳақида гапирган. АҚШнинг бир қанча амалдаги юқори мартабали ҳарбий амалдорлари вазият икки куч ўртасида бевосита урушга олиб келиши мумкинлигидан огоҳлантирган.
Изоҳ (0)