Pentagon Ukrainaga 2,5 milliard dollarlik yangi harbiy yordam paketini ajratdi, bu haqda idora saytida aytiladi.
Unga NASAMS zenit raketa majmualari va HIMARS baravar o‘t ochish reaktiv tizimlari uchun o‘q-dorilar, sakkizta Avenger havo hujumiga qarshi mudofaa tizimlari, 59 ta Bradley jangovar piyodalar mashinalari, 90 ta zirhlangan Stryker mashinalari, 53 ta MRAP minaga qarshi himoyalangan mashinalar kirdi.
Shuningdek, AQSH Ukrainaga HARM radiolokatsiyaga qarshi raketalarini, 350 ta HMMWV zirhli mashinalarini, turli kalibrdagi artilleriya snaryadlarini va boshqa turdagi qurollarni beradi.
Paketga Kiyev so‘ragan Abrams tanklari kirmadi. M1A1 Abrams — AQSHning asosiy jangovar tanki bo‘lib, 1980-yildan buyon seriyali ishlab chiqariladi. 120 millimetrli tank zambaragi bilan jihozlangan. Samarali o‘q otish masofasi — taxminan 2500—3000 metr. Pentagon vakili Sabrina Singx avvalroq bu texnikaga xizmat ko‘rsatish narxi baland bo‘lgani sababli, AQSH hozircha Ukrainaga uni berish maqsadga muvofiq emas, deb hisoblashini aytgandi. Politico amerikalik mansabdorga tayanib xabar berganidek, yordam paketiga Abrams tanklarining kiritilmagani nizo kuchayib ketishi xavfi bilan emas, balki logistika va texnik xizmat ko‘rsatish qiyinchiliklari bilan bog‘liqdir.
CNN hisob-kitoblariga ko‘ra, Rossiyaning Ukrainadagi harbiy operatsiyasi boshlanganidan buyon AQSH Kiyevga xavfsizlik sohasi uchun 26,7 milliard dollar ajratgan.
Ikki mamlakat hamkorligi davrida Vashington tomonidan Kiyevga berilgan eng katta ko‘mak yanvar boshida Ukrainaga ajratilgan 3 milliard dollarlik harbiy yordam paketi bo‘ldi.
Rossiya hukumati Ukrainaga G‘arb qurol-yarog‘lari va texnikasi yetkazib berilayotganini tanqid qilib keladi, bunday xatti-harakatlar nizoning cho‘zilishiga olib kelishini, qurol-yarog‘lar esa Rossiya harbiylari uchun “qonuniy nishon”ga aylanishini aytadi.
Izoh (0)