“Daryo” nashri 20-fevralda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Bayden Kiyevga keldi. Ukraina NATOga a’zo emas, ammo urushdan keyingi urush uchun himoya kafolati bo‘ladimi?
AQSH prezidenti Jo Bayden Yevropaga tashrifi doirasida Kiyevga keldi va Ukraina prezidenti Vladimir Zelenskiy bilan birga Mixayliv soborida ko‘rishdi.
“Ukrainskaya pravda” nashrining yozishicha, Bayden soborga urushda halok bo‘lgan ukrainalik harbiy xizmatchilar xotirasiga hurmat bajo keltirish uchun kelgan. Bu vaqtda esa Kiyevda havo hujumidan ogohlantiruvchi trevoga yangradi.
Keyinroq Zelenskiy Baydenning tashrifini rasman tasdiqladi va amerikalik hamkasbi bilan tushgan suratni e’lon qildi.
Oq uy Bayden Zelenskiy bilan muzokaralar uchun Kiyevga tashrif buyurganini ma’lum qildi. Amerika rahbarining o‘zi esa Ukraina yangi 500 million dollarlik harbiy yordam olishini, bu haqda ertaga rasman e’lon qilinishini aytdi.
Baydenning Kiyevga tashrifi haqida oldindan e’lon qilinmagan. Oq uyning avvalgi xabarida Bayden 20—22-fevral kunlari Polshaga tashrif buyurib, u yerda mamlakat prezidenti Anjey Duda bilan uchrashishi haqida aytilgandi.
Eslatib o’tamiz, mazkur vaziyatda Polsha prezidenti Anjey Duda NATO davlatlarini Ukrainaga urushdan keyingi xavfsizlik kafolatlarini berishga chaqirdi.
Financial Times taʼkidlaganidek, NATO mamlakatlari Ukrainaga bera oladigan kafolatlar boshqacha tuzilishda bo‘lib, NATOning yetakchi kuchlarini, masalan, AQSH, Buyuk Britaniya va Fransiyani kelajakda Ukrainaga hujum qilingan taqdirda harbiy yordam ko‘rsatishga majbur qiladi.
NATOning sobiq bosh kotibi Anders Fog Rasmussen bunday kafolatlarni Isroil AQSHdan olgan kafolatlarga o‘xshash deb ta’rifladi.
Afg‘oniston va Pokiston chegarasida qurolli to‘qnashuvlar boshlandi
Afg‘oniston va Pokiston chegarasidagi Torxam nazorat-o‘tkazish punktida ertalab “Tolibon” jangchilari va Pokiston harbiylarining qurolli to‘qnashuvi yuz berdi, deb xabar bermoqda OAV. Tomonlar bir-birini og‘ir va yengil qurollardan nishonga olgan.
Daily News Nangarhordagi mahalliy manbalarga tayanib otishma hali ham davom etayotganini yozdi. Torxamdagi do‘kon egasi Shabir Ahmadning aytishicha, bugun (20-fevral) ertalabdan beri og‘ir va yengil qurollarning o‘q ovozi eshitilmoqda. Keyinchalik buni tasdiqlovchi video tarqaldi.
Yana bir manbaga ko‘ra, ikki tomon o‘rtasidagi qurolli to‘qnashuv “Tolibon” jangchilari Pokiston harbiy postlaridan biriga yaqinlashganidan keyin boshlangan. Uning aytishicha, Torxam shahri janglar xavfi tufayli yopib qo‘yilgan, “Tolibon” odamlardan vaziyat yaxshilanmaguncha Torxamga bormaslikni so‘ragan.
Torxamdagi “Tolibon” rasmiylari hali mojaroni tasdiqlamagan bo‘lsa-da, harakatning Torxamdagi komissari Muhammad Siddiq kecha tunda Pokiston hukumati yo‘lovchilar harakatini to‘xtatgani uchun Torxam darvozalari yopilganini aytdi.
Torxam nazorat-o‘tkazish punkti Pokiston bilan muhim savdo yo‘llaridan biri hisoblanadi, u yerda har kuni savdo tovarlaridan tashqari minglab odamlar chegaradan o‘tib qaytadi.
Baxmut shahri Rossiya va Ukraina uchun qanday ahamiyatga ega?
Baxmut shahri hozir frontning eng qaynoq nuqtasidir. Rossiya tomonida asosan “Vagner” yollanma askarlari urushayotgan shahar uchun janglar 2022-yil iyul oyidan beri davom etmoqda.
Ukraina uchun Donetsk viloyatidagi Baxmut shahrini himoya qilish qanchalik muhim bu odamlarni yo‘qotishga arziydimi?
Italiya matbuoti mana shu kabi savollariga Vladimir Zelenskiydan javob oldi.
“Bu unchalik katta shahar emas. Ruslar tomonidan vayron qilingan Donbassdagi ko‘plab boshqa shaharlar bilan bir xil. Biz uchun uni himoya qilish muhim, lekin har qanday yo‘qotish evaziga emas, hammaning o‘limi bahosiga emas. Hozircha bu mantiqan to‘g‘ri ekan, kurashaveramiz. Biz qarshilik ko‘rsatmoqdamiz va, shu bilan birga, navbatdagi qarshi hujumga tayyorgarlik ko‘ryapmiz”, — deydi Ukraina prezidenti
Ukraina yetakchisining qayd etishicha, Rossiya kuchlari Baxmutni qo‘lga olib, so‘ng Kramatorsk va Slavyanskka — “iloji bo‘lsa, Donbass chegaralarigacha va Dneprgacha” hujumni davom ettirmoqchi.
Jurnalistlar, shuningdek, Zelenskiydan agar urush davom etsa, Ukraina oyoqda turib bera oladimi yoki yo‘qligini so‘radi. Bunga javoban u Kiyev qisqa muddatli urushga va o‘zining g‘alabasiga hozirlik ko‘rayotganini aytdi.
“Qanchalik tez bo‘lsa, qurbonlar shunchalik kam bo‘ladi. 2014-yilda mojaro muzlatilgandi va bu bizga foyda keltirmadi. Minsk kelishuvlari Putinga o‘tgan yilgi kutilmagan hujumga tayyorgarlik ko‘rish uchun vaqt berdi, biz ortiq tuzoqqa tushmaymiz. Bizning askarlarimiz o‘z oilalarini, uylarini himoya qilayotgani uchun shijoatga to‘lgan”, — deya qo‘shimcha qildi Ukraina prezidenti.
Harbiy tahlilchilarning ta’kidlashicha, Rossiya uchun Baxmutning qo‘lga olinishi ko‘proq ramziy va siyosiy ahamiyatga ega, ammo strategik nuqtayi nazardan muhim emas.
O‘zbekistonda noqonuniy ishdan bo’shatish holatlari bilan qanday kurashish mumkin?
O‘zbekistonda 2022-yilda Mehnat inspeksiyasi tomonidan kasaba uyushma a’zolariga qariyb 54 milliard so‘m zarar pullari undirildi. Bu haqda AOKAda o‘tkazilgan brifingda ma‘lum qilindi.
Xabarga ko‘ra, Kasaba uyushmalari federatsiyasi harakatlari tufayli korxona, tashkilot va muassasalarda tuzilgan jamoa shartnomalarining 106 mingga yaqin, ya’ni 94,6 foiziga xodim bilan mehnat shartnomasini ish beruvchi tomonidan bekor qilishdan avval albatta kasaba uyushma qo‘mitasining roziligini olish talabi kiritilishiga erishilgan. Buning natijasida xodimlarni noqonuniy ishdan bo‘shatish holatlariga chek qo‘yiladi.
Jamoa shartnomalariga kiritish orqali ish vaqti va dam olish vaqtini tartibga solish borasida aksariyat korxona va tashkilotlarda mehnatkashlar uchun asosiy uzaytirilgan va qo‘shimcha ta’tillar o‘rnatilgan.
Bu degani, har yili Jamoa shartnomalari orqali 3 millionga yaqin xodim asosiy uzaytirilgan, 2 million 900 ming nafarga yaqin xodim esa yillik qo‘shimcha ta’tillardan foydalanmoqda.
2022-yilda Kasaba uyushmalarining Mehnat inspeksiyasi tomonidan 77 yarim ming nafar uyushma a’zosining qonuniy huquqlari tiklanib, xodimlar foydasiga salkam 54 so‘m zarar pullari undirib berildi.
Izoh (0)