Ғарб давлатлари ва ташкилотлари Россия босқини бошланганидан кейин Украинага 64 миллиард евро юборишга ваъда берган, бироқ 2022 йил охирига қадар Киев бу маблағнинг ярмидан камроғини – 31 миллиард еврони олган. Бу ҳақда Кил Жаҳон иқтисодиёти институти томонидан ўтказилган тадқиқот натижаларига таяниб, “РБК” хабар бермоқда.
Ҳарбий ҳаракатлар бошланганидан кейин маблағнинг бир қисмини ажратиш учун Европа Иттифоқига сиёсий ва ҳуқуқий розилик олишга олти ойгача вақт керак бўлди, деди институт тадқиқотчиси Кристофер Требеш. Унинг таъкидлашича, бундай кечикишлар ҳарбий тўқнашувнинг фаол босқичида, харажатлар кўпайган ва даромадлар камайган бир пайтда “албатта муаммо” бўлади.
Таҳлилчиларнинг хулосасига кўра, Ғарб давлатлари ўтмишда шунга ўхшаш урушлар пайтида каттароқ ёрдам маблағларини ажратган. Иттифоқчиларнинг ёрдами 1990—1991 йиллардаги Форс кўрфази уруши пайтида масалан Германия улушида мамлакат ялпи ички маҳсулотининг 0,5 фоизига тенг бўлган, бу Берлин Киевга ваъда қилган маблағдан деярли уч баравар кўп.
“Мен шу билан солиштирганда қанчалик кичик эканига ҳайрон бўлдим, чунки ҳозир ўша пайтдагидан анча бой ва иқтисодий жиҳатдан қудратлироқмиз. Агар истасак, кўпроқ иш қила оламиз”, — деди Требеш.
Европа Иттифоқи ва Европа инвестиция банки 2022 йил давомида биргаликда 30 миллиард еврога яқин маблағ ажратишга келишиб олди, бироқ бу маблағнинг 17,5 миллиард евро қисми ҳалигача олинмаган, дейди таҳлилчилар. Ноябрь ойида Европа Иттифоқи тўлов механизмини қайта кўриб чиқиб, Украинани 2023 йилда “мунтазам молиявий ёрдам” олишига ишонтирди, ҳамда Киев ойига тахминан 1,5 миллиард евро олишини кафолатлади.
Украина ҳар ойда хорижий ҳамкорлардан 3 миллиард доллар олиши керак, деб баҳолади мамлакат Молия вазирлиги февраль ойида. Вазир ўринбосари Олга Зикованинг сўзларига кўра, ҳукумат аллақачон бюджет тақчиллигини камайтириш бўйича тизимли ишларни амалга оширган, АҚШ ва Европа Иттифоқи 2023 йилда 30 миллиард долларлик маблағ ажратишга тайёрлигини тасдиқлаган.
“Бироқ яна 10 миллиард долларга эҳтиёж қолмоқда. Бу ерда биз бошқа давлатлар ва халқаро молия ташкилотлари, хусусан, Халқаро валюта жамғармаси ёрдамига умид қиламиз”, — дея қўшимча қилди у.
Изоҳ (0)