“Tamaki mahsulotlari solig‘idan dorilar uchun mablag‘ ajratiladi” — bolalar onkologi davlat tomonidan berilayotgan bepul dori-darmonlar haqida gapirdi (foto, video)

Bolalar milliy tibbiyot markazi bolalar onkologi Kamol Iskandarov “Daryo”ga bergan intervyusida ayni kunda markazda 38 ta bemor davolanayotgani va ularning dori ta’minoti qanday yo‘lga qo‘shilayotgani haqida to‘xtalib o‘tdi.

— Dorilar masalasi eng og‘riqli nuqtamiz. Chunki asosiylaridan tashqari qo‘llab-quvvatlovchi dorilar ham juda ko‘p. Kimyoviy terapiyada qo‘llaniladigan dorilar esa ancha qimmat. Davlat tomonidan dorilar taʼminoti bir necha yerdan berilishi belgilangan. Masalan, tamaki mahsulotlaridan tushadigan soliqdan mablag‘ ajratiladi. Prezidentimiz qarorlari bilan tuzilgan jamg‘arma fondlari ham har yili dori-darmon taʼminoti uchun mablag‘ ajratadi. Davlat budjeti hisobidan beriladigan dori-darmonlar ham bor. Bundan tashqari, kasalxonalar to‘lov asosida davolangan bemorlar hisobidan tushgan pullar hisobidan ham dori-darmonlarni sotib oladi. 
2021-yili kimyoviy terapiya uchun kerakli dorilardan taqchillik bo‘lgani yo‘q. Ammo qandaydir sabablarga ko‘ra, 2022-yilda avvalgi yildagiga nisbatan 50-60 foiz kamroq dorilar berildi. Uning o‘rnini o‘z-o‘zini moliyalashtirish hisobidan to‘ldirishga harakat qilindi. 2023-yil uchun ham kerakli dorilar bo‘yicha maʼlumot berganmiz. O‘ylaymanki, asosiy dorilar o‘z vaqtida berilsa onkologik kasallikka chalingan bolalarning sog‘ayish ko‘rsatgichi sezilarli darajada ortadi, — deydi bolalar onkologi Kamol Iskandarov.