Shavkat Mirziyoyev 20-fevral, dushanba kuni Misr sivilizatsiyasi milliy muzeyiga tashrif buyurdi. Bu haqda prezident matbuot xizmati xabar berdi.
Hozirda Qohiraning tarkibiga kirgan qadimiy Fustat shahrida joylashgan muzey Misrning boy tarixidan hikoya qiluvchi noyob eksponatlar to‘plamiga ega.
Bu yerda qadim zamonlardan to hozirgi kungacha bo‘lgan davrni o‘z ichiga olgan 50 mingdan ortiq ashyolar, jumladan, fir’avnlar mumiyolari, hukmdorlar taxtlari va haykallari, zargarlik buyumlari, shuningdek, uy-ro‘zg‘or va hunarmandchilik buyumlari ko‘rgazmaga qo‘yilgan.
Davlat rahbari ekspozisiyaning Qadimgi, O‘rta va Yangi hukmdorlik, yunon, O‘rta asr va islom davrlariga oid qator xronologik va tematik bo‘limlari bilan tanishdi. Prezident Misr zaminida bir-birini almashlab kelgan turli sivilizasiyalarning yodgorliklarini katta qiziqish bilan ko‘zdan kechirar ekan, tarix va madaniyat birdek buyuk merosga ega xalqlarni yaqinlashtirishning muhim vositasi ekanini ta’kidladi.
Misr tomoni vakillari, o‘z navbatida, O‘zbekiston rahbariga muzeyga tashrif uchun minnatdorlik bildirib, xalqlarimizni bog‘lab turuvchi mushtarak jihatlar ko‘pligi, bu do‘stlik va o‘zaro anglashuv rishtalarini mustahkamlashga xizmat qilayotganini ta’kidladi. Shu ma’noda, ikki mamlakat muzeylari va tarixchilari o‘rtasidagi hamkorlikni kengaytirish, umumiy merosimizni birgalikda o‘rganish, o‘zaro ko‘rgazmalar, madaniyat kunlarini tashkil etish muhimligi ta’kidlandi. Prezident muzeyning Faxriy mehmonlar kitobida qayd qoldirdi.
Izoh (0)