Energetika, to‘qimachilik, oziq-ovqat mahsulotlarini ishlab chiqarish, farmatsevtika. Qohirada bo‘lib o‘tgan O‘zbekiston—Misr biznes forumida qaysi sohalar bo‘yicha kelishuvlarga erishildi?

Qohira shahrida O‘zbekiston prezidenti Shavkat Mirziyoyevning Misr Arab Respublikasiga rasmiy tashrifi arafasida O‘zbekiston—Misr biznes forumi bo‘lib o‘tdi. Unda tegishli vazirlik, idora va tarmoq birlashmalari rahbarlari hamda ikki mamlakat ishbilarmon doiralarining 200 ga yaqin vakillari ishtirok etdi.

Tadbirda so‘zga chiqqanlar iqtisodiyotlarning ustuvor tarmoqlarida ikki tomonlama sarmoyaviy, savdo-iqtisodiy hamkorlik va sanoat kooperatsiyasini rivojlantirish uchun katta salohiyat mavjudligini taʼkidladi. Forum doirasida vazirlik, idora va tarmoq birlashmalari rahbarlarining ikki mamlakat iqtisodiyotlarining ustuvor yo‘nalishlaridagi istiqbolli loyihalar taqdimotlari o‘tkazildi.

Aniq yo‘nalish va loyihalar bo‘yicha hamkorlikning amaliy jihatlarini muhokama qilish maqsadida G2B va B2B uchrashuvlari ham o‘tkazildi. Ochiq muloqot ruhida kechgan ushbu uchrashuvlar tomonlarga manfaatlar kesishadigan nuqtalarini aniqlash imkonini berdi.

Biznes-forum yakunlari bo‘yicha:

— kimyo;
— energetika;
— tog‘-kon sanoati;
— to‘qimachilik;
— charm-poyabzal va oziq-ovqat mahsulotlari mahsulotlari ishlab chiqarish;
— sanoat zonalarini rivojlantirish, infratuzilmani rivojlantirish;
— qurilish;
— farmatsevtika kabi sohalarda qo‘shma loyihalarni amalga oshirish yuzasidan kelishuvlarga erishildi.

Ma’lumot o‘rnida, Shavkat Mirziyoyev Misr prezidenti Abdulfattoh As-Sisining taklifiga binoan 20—21-fevral kunlari rasmiy tashrif bilan ushbu mamlakatda bo‘ladi.