O‘zbekistonda o‘tgan ikki yil davomida chorvachilik loyihalariga ajratilgan 14 milliard so‘mdan ortiq kredit mablag‘laridan maqsadsiz foydalanilgan. Bu haqda Senatning Agrar va suv xo‘jaligi masalalari qo‘mitasi majlisida ma’lum qilindi, deya xabar bermoqda yuqori palata axborot xizmati.
Yig‘ilishda Senatda o‘tkaziladigan navbatdagi yalpi majlisda muhokama qilinishi nazarda tutilgan masalalar dastlabki tarzda ko‘rib chiqilgan. Xususan, chorvachilik va ipakchilik yo‘nalishida Namangan viloyatida bajarilayotgan ishlar bo‘yicha o‘rganish natijalari muhokama qilingan.
Xabarga ko‘ra, viloyatda chorvachilik tarmog‘ini rivojlantirish, naslchilik ishlari hamda veterinariya xizmatlarini ko‘rsatish, ozuqa bazasini mustahkamlash va mahsulot ishlab chiqarish hajmlarini ko‘paytirish bo‘yicha loyihalar amalga oshirib kelinmoqda. Ammo o‘rganish davomida o‘z yechimini kutayotgan ayrim muammolar aniqlangan.
“Viloyatning ayrim tumanlarida tashkil etilishi lozim bo‘lgan chorva kompleksi tashkil etilmagani va olib kelinishi rejalashtirilgan qoramollar o‘z vaqtida yetkazilmagani oqibatida yangi ish o‘rinlari yaratilmagan. So‘nggi 2 yilda chorvachilik yo‘nalishidagi loyihalarni amalga oshirish uchun ajratilgan 14 milliard so‘mdan ortiq kredit mablag‘laridan maqsadsiz foydalanilgan”, – deyiladi xabarda.
Qo‘shimcha qilinishicha, qishloq xo‘jaligi loyihalarini amalga oshirish uchun yer maydonlari ajratib berilmagani sababli ayrim loyihalar o‘z vaqtida ishga tushirilmagan.
Muhokama jarayonida mas’ul mutasaddilarning belgilangan vazifalarni bajarishda sustkashlikka yo‘l qo‘yayotgani hamda ushbu masala parlament nazoratida ekani ta’kidlangan.
Izoh (0)