Ўзбекистонда ўтган икки йил давомида чорвачилик лойиҳаларига ажратилган 14 миллиард сўмдан ортиқ кредит маблағларидан мақсадсиз фойдаланилган. Бу ҳақда Сенатнинг Аграр ва сув хўжалиги масалалари қўмитаси мажлисида маълум қилинди, дея хабар бермоқда юқори палата ахборот хизмати.
Йиғилишда Сенатда ўтказиладиган навбатдаги ялпи мажлисда муҳокама қилиниши назарда тутилган масалалар дастлабки тарзда кўриб чиқилган. Хусусан, чорвачилик ва ипакчилик йўналишида Наманган вилоятида бажарилаётган ишлар бўйича ўрганиш натижалари муҳокама қилинган.
Хабарга кўра, вилоятда чорвачилик тармоғини ривожлантириш, наслчилик ишлари ҳамда ветеринария хизматларини кўрсатиш, озуқа базасини мустаҳкамлаш ва маҳсулот ишлаб чиқариш ҳажмларини кўпайтириш бўйича лойиҳалар амалга ошириб келинмоқда. Аммо ўрганиш давомида ўз ечимини кутаётган айрим муаммолар аниқланган.
“Вилоятнинг айрим туманларида ташкил этилиши лозим бўлган чорва комплекси ташкил этилмагани ва олиб келиниши режалаштирилган қорамоллар ўз вақтида етказилмагани оқибатида янги иш ўринлари яратилмаган. Сўнгги 2 йилда чорвачилик йўналишидаги лойиҳаларни амалга ошириш учун ажратилган 14 миллиард сўмдан ортиқ кредит маблағларидан мақсадсиз фойдаланилган”, – дейилади хабарда.
Қўшимча қилинишича, қишлоқ хўжалиги лойиҳаларини амалга ошириш учун ер майдонлари ажратиб берилмагани сабабли айрим лойиҳалар ўз вақтида ишга туширилмаган.
Муҳокама жараёнида масъул мутасаддиларнинг белгиланган вазифаларни бажаришда сусткашликка йўл қўяётгани ҳамда ушбу масала парламент назоратида экани таъкидланган.
Изоҳ (0)