“Uenzdey” 2022-yilning eng ko‘p tomosha qilingan serialiga aylandi

Netflix’ning “Uenzdey” seriali HBO telekanalining “Ajdar uyi” loyihasini ortda qoldirib, 2022-yilning eng ko‘p tomosha qilingan serialiga aylandi. Buni Samba TV to‘plagan statistik ma’lumotlar tasdiqladi.

Hisobotda aytilishicha, “Addams oilasi” haqidagi spin-off 40 kun ichida “Taxtlar o‘yini”ning Targariyenlar o‘rtasidagi urushi haqida so‘zlovchi “Ajdar uyi” serialiga qaraganda ko‘proq auditoriyani to‘plashga muvaffaq bo‘lgan. “Uenzdey” serialiga katta qiziqishni tomoshabinlarning o‘smirlar kontingenti va ularning ijtimoiy tarmoqlardagi faolligi oshirgan.

“Uenzdey” va “Ajdar uyi”dan tashqari yana ikkita Netflix loyihalari: “Monstr: Jeffri Damer hikoyasi” va “Qo‘riqchi” seriallari premyeradan 15 kun o‘tib tomoshabinlar e’tiborini o‘zida ushlab tura oldi.

Yanvar oyida Netflix “Uenzdey” serialining ikkinchi mavsumi suratga olinishini ma’lum qilgan edi.