Turkiya va Suriyada sodir bo‘lgan zilzilalar oqibatida halok bo‘lganlar soni 40 mingdan oshdi. Bu haqda Al Jazeera xabar berdi.
Turkiya hukumati vayronalar ostidan 35 418 kishining jasadi topilganini, Suriya rasmiylari esa 5 800 dan ortiq odam o‘lganini ma’lum qildi. Turkiya prezidenti Rajab Toyyib Erdo‘g‘on mamlakatda vayronalar ostidan 8 mingdan ortiq odam tirik olib chiqilganini ta’kidlagan.
Xalqaro migratsiya tashkilotining gumanitar yordam yuklangan o‘nta yuk mashinasi Bab el-Salom nazorat-o‘tkazish punkti orqali Suriyaga jo‘natilgan. Turkiyadagi zilziladan 200 soat o‘tgach qutqaruvchilar vayronalar ostidan tirik odamlarni ham aniqlamoqda.
BMT hisob-kitoblariga ko‘ra, zilzilalardan so‘ng Suriyada 5,3 millionga yaqin odam boshpanasiz qolishi mumkin. Turkiya va Suriyada 900 mingga yaqin odam zudlik bilan issiq ovqatga muhtoj.
Turkiya va Suriyadagi zilzila
2023-yilning 6-fevralida Turkiyaning janubi-sharqida 7,8 magnitudali zilzila sodir bo‘ldi, 100 ga yaqin davlat yordam taklif qildi. Mamlakat aholisi zilzilalarni mahalliy vaqt bilan soat 04:17 da sezgan, zilzila o‘chog‘i Gaziantep shahri bo‘lgan. Rasmiylar bu shaharni butunlay buzib tashlab, qayta qurilishga qaror qilgan.
Turkiya prezidenti mazkur zilzila 1939-yildan beri eng kuchli yer silkinishi hisoblanishini aytdi. Shuningdek, Rajab Toyyib Erdo‘g‘on Turkiya nafaqat o‘z tarixidagi, balki insoniyat tarixidagi eng yirik tabiiy ofatlardan biriga duch kelganini aytdi. Prezident “Turkiya qiyin paytlarda yordam qo‘lini cho‘zganlarni unutmasligini bildirdi.
Izoh (0)