O‘zbekiston valyuta birjasida 2022-yilgi savdolar hajmi 700 trln so‘mlik rekord darajani qayd etdi
O‘zbekiston Respublika valyuta birjasida (O‘zRVB) savdolarning umumiy hajmi 2022-yilda rekord daraja — 706,79 trln so‘mga yetdi. Bu haqda AOKAda o‘tkazilgan brifingda Valyuta birjasi axborot xizmati rahbari Gulshan Botirova ma’lum qildi.
Birjada savdolar o‘tgan yilga nisbatan 81,6 foizga o‘sgan.
O‘zRVB tomonidan valyuta, pul, davlat qimmatli qog‘ozlari bozorlarida va 2022-yildan boshlab derivativlar bozorida birja savdolari tashkil etilgan.
Birja savdolarining xizmat turlari davlat qimmatli qog‘ozlarini hisobga olish va ularni saqlash bo‘yicha depozitar xizmatlarni ko‘rsatish hamda hisob-kitob va kliringni amalga oshirish kabi funksiyalarni ham qamrab olgan.
Valyuta bozori haqida
O‘zRVB valyuta bozorida AQSH dollari, yevro, Rossiya rubli va Xitoy yuani oldi-sotdisi bo‘yicha spot operatsiyalari O‘zRVB tomonidan ishlab chiqilgan “Rhombus” platformasida "koll-auksion" hamda ikki tomonlama auksion usullari orqali amalga oshiriladi.
2022-yil yakunlari bo‘yicha birja valyuta bozoridagi savdolarning umumiy hajmi 338,34 trln so‘mni tashkil etib, o‘tgan yilning mos ko‘rsatkichiga nisbatan 1,5 barobar oshdi.
Pul bozori to‘g‘risida
Banklararo pul bozorida bugungi kunda O‘zRVBning maxsus elektron platformasi orqali banklarning bo‘sh pul mablag‘larini 1 kundan bir yilgacha bo‘lgan muddatga jalb qilish va joylashtirish bo‘yicha savdolar o‘tkazilib, Markaziy bankning banklar bilan depozit auksionlari ham tashkil etilgan.
Ushbu bozorda o‘tkaziladigan savdolar bozor qatnashchilariga qisqa muddatli aktivlarga pul mablag‘larini tezkor ravishda jalb qilish va joylashtirish uchun qo‘shimcha imkoniyat yaratadi.
So‘nggi yillardagi hajmlar ijobiy dinamikasi pul bozori instrumentlari jozibadorligi to‘g‘risida dalolat beradi.
2022-yilda ushbu bozordagi savdolarning umumiy hajmi rekord daraja — 270,61 trln so‘mni tashkil etib, o‘tgan yilgi ko‘rsatkichga nisbatan deyarli 93 foizga oshdi.
Davlat qimmatli qog‘ozlari bozori
Ushbu bozorda O‘zRVBning elektron savdo-depozitar platformasi orqali O‘zbekiston Moliya vazirligining g‘aznachilik majburiyatlari va obligatsiyalari, shuningdek Markaziy bankning obligatsiyalari birlamchi joylashtirilishi va ikkilamchi muomalasi bo‘yicha savdolar, shuningdek RЕPO operatsiyalari tashkil etilgan.
2022-yilda ushbu bozorda jami 87,29 trln so‘m qiymatida davlat qimmatli qog‘ozlari joylashtirilgan bo‘lib, 2021-yilga nisbatan ushbu ko‘rsatkich 3,5 barobar oshdi.
