Toshkentda masjidlarda o‘g‘rilik qilgan 20 yoshli yigitga hukm o‘qildi

Toshkent shahridagi masjidlarda o‘g‘rilik qilgan 20 yoshli yigit 5 yil muddatga ozodlikdan mahrum qilindi. Bu haqda “Bu kun” teledasturida xabar berildi.

Qayd etilishicha, yigit 2022-yil noyabr oyida juma namozini o‘qish uchun “Novza” masjidiga borgan va tahoratxonadan birovning ustki kiyimidan 5 million so‘mdan ortiq pulni o‘g‘irlagan.

“Kurtkamni olayotganimda birovning cho‘ntagida pul ko‘rindi. Bilmasdan, adashib olib qo‘ydim. 5 million so‘m oldim. Keyin juma namozini o‘qib chiqib ketdim. Oradan 10 kun o‘tib asr namozini o‘qish uchun masjidga bordim. U yerda ham pul ko‘ringani uchun oldim. Shundan keyin bozorga borib, telefon sotib oldim”, — deydi ayblanuvchi.

Masjidlardan yigitga Jinoyat kodeksining 169-moddasi (o‘g‘rilik) 3-qismi “a” bandida nazarda tutilgan jinoyatlarni sodir etganlikda aybli deb topilgan shaxsga oid jinoyat ishi ko‘rib chiqilgan. 

Jinoyat ishlari bo‘yicha Chilonzor tuman sudida sudyasi qaroriga ko‘ra, umumiy miqdori 11 million 416 ming so‘m miqdorida pul o‘g‘irlagan yigit tegishli modda bilan aybli deb topilib, unga 5 yil muddatga ozodlikdan mahrum qilish jazosi tayinlangan, jazo umumiy tartib o‘rnatilgan koloniyada o‘taladi.

Mavzuga doir:

• Toshkentda 7 ta masjidda sodir etilgan o‘g‘riliklarda gumonlangan shaxs qo‘lga olindi
• Toshkentdagi 3 ta masjidda fuqarolarning telefoni va pullarini o‘g‘irlagan xavfli retsidivist 7 yilga qamaldi