Тошкент вилояти Чирчиқ шаҳридаги 4-сонли мактаб биносининг пойдевори чўкиб, деворлари ёрилди. Қурилиш ва уй-жой коммунал хўжалиги вазирлиги ахборот хизмати ҳолат юзасидан муносабат билдирди.
Қайд этилишича, объектда шу кунга қадар назорат инспекцияси томонидан мунтазам текшириш олиб борилиб, қурилиш-монтаж ишлари сифати устидан пудратчи, лойиҳачига 2 марта ёзма кўрсатма берилган ҳамда улар ижроси таъминланган.
Кейинроқ объектни фойдаланишга топшириш бўйича ишчи комиссия аъзолари ва инспекция томонидан берилган камчиликлар пудратчи томонидан тўлиқ бартараф этилмагани сабабли ҳозирги кунда ушбу фойдаланишга топшириш баённомаси инспекция томонидан расмийлаштирилмаган.
Бинонинг ташқи деворидаги ёриқлар сабаб том қисмидан тушаётган ёмғир сувлари бинонинг пойдевор қисмига кетаётганлиги оқибатида пойдеворда чўкиш юзага келган. Бугунги кунда юзага келган ёриқлар пудратчи томонидан таъмирланган. Пудратчига баҳорги таътил вақтида қайта тўлиқ таъмирлаш бўйича кўрсатма ҳам тақдим этилган.
Қурилиш объектида ишлаб чиқилган ва тасдиқланган ишчи лойиҳа ҳужжатларига асосан 120 ўринли қўшимча бино қурилиши кўрсатилган бўлиб, ушбу бино қурилиши бош режада кўрсатилган ҳудудда кўп йиллик дарахтларни кесишнинг имкони бўлмаганлиги сабабли аввал белгиланган жойдан бошқа ерга кўчирилган. Қурилиш жараёнида киритилган ўзгартиришларга буюртмачи томонидан 2020 йил март ойида баённома расмийлаштирилган.
Изоҳ (0)