Turkiyada yuz bergan kuchli zilzila minglab binolarni vayron qilgani ortidan o‘zbek jamoatchiligida turk quruvchilariga nisbatan biroz ishonchsizlik paydo bo‘ldi. Seysmologiya instituti direktori o‘rinbosari Vohidxon Ismoilov “Daryo”ga bergan intervyusida bunday fikrda bo‘lish noto‘g‘riligini, turklar dunyodagi yetakchi quruvchilar hisoblanishini aytdi.
Vohidxon Ismoilovning taʼkidlashicha, asosiy masala turklar olib kelayotgan loyihalarni O‘zbekiston qurilish meʼyorlariga moslashtirish bilan bog‘liq.
“Zilzila yuz bergandan keyin albatta, qurbonlar ham bo‘ladi. O‘tgan kungi matbuot anjumanida jurnalistlardan biri, zilzilaga chidamsiz binolar quradigan bo‘lsa, O‘zbekiston nega turk quruvchilariga bino qurish uchun ruxsat bermoqda, deb so‘radi.
Aslida unday emas. Turklar dunyodagi eng kuchli quruvchilar hisoblanadi. Ularning mavqeyi juda yuqori. Asosiy masala — ular olib kelayotgan qurilish loyihalarini O‘zbekiston qurilish meʼyorlariga moslashtirishda. Agar mos bo‘lmasa, u loyihalar amalga oshmasin.
Oddiy misol, “Milliy bank”ning Toshkent shahri, Yunusobod tumanidagi 26 qavatli binosini Turkiyaning “Aysel” firmasi qurgan. Bino loyihasi ham o‘sha kompaniyaniki. Bino qurilishi boshlanganda, biz to‘xtatib qo‘yganmiz. Chunki qurilish loyihasi bizning meʼyorlarga to‘g‘ri kelmaydigan darajada edi. Oxiri ular moslashtirishga majbur bo‘ldi. Qurilish ancha vaqt to‘xtab qoldi. Chunki loyihani o‘zgartirish kerak. Loyiha o‘zgargach, “Milliy bank” bilan to‘polon bo‘lib ketdi. Oxiri Yaponiyadan ekspertlar olib kelindi va ular bizning eʼtirozlarimizni o‘rinli deb topdi. So‘ngra turklar binoni O‘zbekiston qurilish meʼyorlari bo‘yicha qurish majburiyatini oldi va loyihani o‘zgartirdi. O‘sha paytda ularning maqsadi fundamentni 9 metrga tushirib, binoni ko‘tarish edi. Biz uni 32 metrga tushirish kerakligini aytganmiz. Keyin biz qo‘ygan talablar asosida bino mustahkam qurildi”, – dedi olim.
Vohidxon Ismoilovning maʼlum qilishicha, hozirda O‘zbekistondagi ijtimoiy obyektlarning barchasida seysmobardoshli pasport bor.
Maʼlumot uchun, 6-fevral kuni Turkiyada 7,4–7,8 magnitudali vayronkor zilzilalar sodir bo‘la boshladi.
Mamlakatning qator shaharlarini vayron qilgan zilzilada, oxirgi maʼlumotlarga ko‘ra – 31 ming 643 kishi halok bo‘ldi, jarohatlanganlar soni 80 ming nafardan ortdi. Hozirda 166 ming 334 nafar qidiruv-qutqaruv va ko‘maklashuv xodimlari zilzilalar yuz bergan hududlarda ishlamoqda. Hisob-kitoblarga ko‘ra, zilzilalar Turkiya iqtisodiyotiga 84 milliard dollar zarar yetkazgan.
Izoh (0)