O‘zbekistonda ishga joylanmagan bitiruvchilari soni ko‘p bo‘lgan OTM sifatsiz taʼlim berayotgan muassasa deb topilishi va kelajakda ularning faoliyatini tugatish masalasi ko‘rib chiqilishi mumkin. Bu haqda Oliy taʼlim, fan va innovatsiyalar vazirligi xabar berdi.
Qayd etilishicha, vazirlik rahbari Ibrohim Abdurahmonov oliy taʼlim muassasalari rektor va masʼul prorektorlari bilan kengaytirilgan onlayn formatda yig‘ilish o‘tkazdi. Unda OTMdagi iqtidorli talabalar ro‘yxatini tuzish va ular bilan alohida ishlash mexanizmini yo‘lga qo‘yish masalasida takliflar berildi.
Oliy va professional taʼlim muassasalari bitiruvchilarini ishga joylashtirish masalasiga alohida eʼtibor qaratilishi, ayniqsa ishga joylanmagan bitiruvchilari soni ko‘p bo‘lgan OTM sifatsiz taʼlim berayotgan muassasa deb topilishi va kelajakda ularning faoliyatini tugatish masalasi ko‘rib chiqilishi haqida ogohlantirildi.
Yig‘ilishda OTMlarni muqobil energetikasiga o‘tkazish masalasi ham muhokama qilingan. Vazir quyosh panellari OTMning yillik elektr energiya sarfining kamida 70 foizini qoplashi shartligini taʼkidlab, bu maqsadga erishish uchun barcha taʼlim muassasalarining mavjud o‘quv, laboratoriya, yordamchi va yotoqxona binolarining tom qismini mutaxassis jalb qilgan holda texnik tomonlama quyosh panellarini o‘rnatish imkoniyatini aniqlash va quyosh panellarini o‘rnatishga sarflanadigan xarajatlar smetasini tuzish bo‘yicha topshiriq bergan.
Izoh (0)