Наманганлик Дилдора Ҳабибуллаева Наманган давлат университети филология факультетининг биринчи босқичида таҳсил олади. У Навоийнинг 100 та ғазалини ёд олган, энди эса “Хамса”ни ўрганишга бел боғлаган. “Дарё” мухбири Азизбек Абдувалиев келгусида навоийшунос олима бўлишни орзу қилаётган талаба билан суҳбатлашди.
“Ғазалларни фақат ёдлаш эмас, уларнинг маъносини ҳам англаш керак”
“Ёшим 18 да, Наманган туманининг Тепақиёт қишлоғиданман. Адабиётга, Навоийга қизиқишим мактаб остонасини ҳатламай туриб, 5-6 ёшимдан бошланган. Чунки ойим адабиёт ўқитувчиси, уйимиз тўла китоб, бобом дутор чалиб, Навоий, Машраб ғазалларини хиргойи қилиб берарди.
Мен ҳам, мендан кейинги икки синглим ҳам шундай муҳитда улғайганмиз, бу қизиқиш қон-қонимизга сингиб кетган. Аввал мактаб дарсликларида берилган ғазалларни ёд олдим, кейинчалик мустақил равишда девонларни ўқишга киришдим. Билимлар беллашувлари, фан олимпиадалари, турли танловларда иштирок этдим.
Республика миқёсида “Навоий ворислари” танлови ўтказилаётгани ҳақида эшитиб, унда қатнашишга аҳд қилдим, ёдлаган ғазалларим сонини кўпайтирдим. Албатта, қуруқ ёдлаш билан иш битмайди, луғат титкилаб, уларнинг маъносини ўрганиш, таҳлил қилишга ҳам уриндим. Мактаб, туман саралашларидан ўтиб, вилоят босқичида иккинчи ўринни олиб қайтдим. Кўзланган марра бўлмади, лекин ҳаракатдан тўхтамадим.
Ниҳоят, 2018 йили вилоятда ғолиб бўлиб, Навоий шаҳрида ўтказилган республика танловига йўл олдим ва совриндорлар қаторидан ўрин олдим. Ўша пайт 100 та ғазални ёддан билардим, ҳозир уларнинг сони 125 дан ошди. Энди эса “Хамса”ни ўрганишга киришмоқчиман. Бунда, албатта, устозларим, хусусан, Наманган туманидаги 24-умумтаълим мактаби она тили ва адабиёт ўқитувчиси Ҳидоят Полвонова, НамДУ доценти Фарида Каримовадан олган сабоқларимга таянаман.
Болалик пайтларим Навоий ғазалларини айтиб берсам айрим тенгдошларимга эриш туюларди, бундан ўшанда ўксинган пайтларим ҳам бўлган. Лекин бугунга келиб англаб етдимки, ҳазрат ижодига қизиқиш туфайли жуда кўп нарсаларга эришибман. Озми-кўпми танилдим, дўстлар орттирдим, танловларда ғолиб бўлдим, шу соҳанинг этагини тутдим. Келажакда Навоий ижодини тадқиқ этишда давом этиб, устозларим каби етук олима, профессор бўламан”, — дейди суҳбатдош.
“Ҳозир фақат эртакларни ифодали ўқиб беряпмиз, холос”
НамДУ доценти Фарида Каримова “Навоий ворислари” танлови ҳайъат аъзоси бўлган пайтларидан тиришқоқ ва изланувчан қизни кўз остига олганди. Бугунги кунга келиб Дилдора филология факультетида, қўл остида таҳсил олмоқда. Бу эса унга билганларини ўргатиш ва катта мақсадларга чорлаш имкониятини янада кенгайтирди.
“Навоий ғазалларини ёд олиш ва англаб етиш осон вазифа эмас, кишидан маълум бир тайёргарликни талаб қилади. Чунки уларда арабий ва форсий сўзлар, яширин маънолар кўп. Шу учун бунга бел боғлаган ёшларни ҳар қанча олқишласа, қўллаб-қувватласа арзийди. Афуски, ҳозирги пайтда болаларимизга фақат эртакларни ифодали ўқиб беряпмиз холос. Аслида уларга эсини таниган пайтдан Навоий, Бобур ва бошқа буюкларимиз ижодидан намуналарни айтиб, ёдлатиб борсак, кўпроқ нарсага эришган бўлардик.
Ҳозир Дилдора билан махсус режа асосида иш бошладик. Биринчи вазифа Навоий ғазалларини ифодали ўқишни янада мукаммалаштириш, бу борадаги камчиликларни бартараф этиш, ёд олинган 100 та ғазал миқдорини кўпайтириш. Қолаверса, шоир шеърияти борасидаги изланишлар олиб бориш, мақола ва шарҳлар тайёрлаш. Қизимиз келгусида Навоий ижодининг яхши бир тарғиботчиси бўлади деган умиддаман”, — дейди Фарида Каримова.
Қаҳрамонимиз билан 9 февраль, Мир Алишер Навоий таваллудига 582 йил тўлган куни интервью олдик. Бу биз учун анча машаққатли бўлди, чунки Дилдора нафақат ўзи ўқиётган университет, балки туғилиб-ўсган туманидаги навоийхонлик тадбирларига ҳам таклиф этилган экан. Буни ҳам яхшиликка йўйдик ва навоийшунос олима бўлишни кўзлаган талаба ёзажак асарлар шундай қўлма-қўл ўқилишини тилаб, хайрлашдик.
Изоҳ (0)