“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 18-soni mavzusi “Taʼlimga eʼtibor bor, tarbiyaga-chi?” bo‘lib, dastur mehmoni sifatida taʼlim sohasi eksperti Bahodir G‘aniyev taklif etildi.
— “Kamolot”dan keyin Yoshlar ittifoqi, so‘ng Yoshlar ishlari agentligi tuzildi. Bu paytda taʼlimda “Tengqur — tengqurga” tizimini qo‘llashga harakat qilayotgan har bir taʼlim muassasasida yoshlar yetakchilari tizimi mavjud edi. Zo‘r ishlayotgandi demayman, lekin o‘sha tizim bilan ishlash mumkin edi. Uni to‘xtatib turib, yoshlar yetakchilarini mahallaga biriktirib, mahalla yoshlari orqali ishlaymiz, degan fikr qaysi “aqlli”ning xayoliga kelib davlat rahbariga imzo qo‘ydirib chiqqan, bilmayman. Bu ishni umuman tarbiya tizimiga tushunmaydigan odamlar qilgan.
O‘zi yoshlarni yig‘ish, birlashtirish qiyin. U taʼlim muassasasiga har kuni keladi: giyohvand bo‘lib ketdimi, radikal diniy oqimlarga kirib ketyaptimi, xatti-harakati, o‘zini tutishida o‘zgarishlar paydo bo‘lyaptimi — o‘qishdaligida payqash oson. Lekin taʼlimda u bilan shug‘ullanadigan maxsus tizim, yoshlarning ichiga kiradigan masʼullar bo‘lmasa, mahallada ularni yig‘ib bo‘lmaydi.
Shunga qaramay, mahallaga alohida shtat berildi, yoshlar masalalari, tadbirkorlik masalalari bo‘yicha hokim yordamchilari kiritildi. Har bir mahallaga biriktirilgan masʼullar orqali yoshlar bilan ishlash, ularni birlashtirish, tadbirlar o‘tkazish, shuningdek, sovet davrining ishlamagan mexanizmlarini qo‘llashga harakat qilindi, — deydi mutaxassis.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)