“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 18-сони мавзуси “Таълимга эътибор бор, тарбияга-чи?” бўлиб, дастур меҳмони сифатида таълим соҳаси эксперти Баҳодир Ғаниев таклиф этилди.
— “Камолот”дан кейин Ёшлар иттифоқи, сўнг Ёшлар ишлари агентлиги тузилди. Бу пайтда таълимда “Тенгқур — тенгқурга” тизимини қўллашга ҳаракат қилаётган ҳар бир таълим муассасасида ёшлар етакчилари тизими мавжуд эди. Зўр ишлаётганди демайман, лекин ўша тизим билан ишлаш мумкин эди. Уни тўхтатиб туриб, ёшлар етакчиларини маҳаллага бириктириб, маҳалла ёшлари орқали ишлаймиз, деган фикр қайси “ақлли”нинг хаёлига келиб давлат раҳбарига имзо қўйдириб чиққан, билмайман. Бу ишни умуман тарбия тизимига тушунмайдиган одамлар қилган.
Ўзи ёшларни йиғиш, бирлаштириш қийин. У таълим муассасасига ҳар куни келади: гиёҳванд бўлиб кетдими, радикал диний оқимларга кириб кетяптими, хатти-ҳаракати, ўзини тутишида ўзгаришлар пайдо бўляптими — ўқишдалигида пайқаш осон. Лекин таълимда у билан шуғулланадиган махсус тизим, ёшларнинг ичига кирадиган масъуллар бўлмаса, маҳаллада уларни йиғиб бўлмайди.
Шунга қарамай, маҳаллага алоҳида штат берилди, ёшлар масалалари, тадбиркорлик масалалари бўйича ҳоким ёрдамчилари киритилди. Ҳар бир маҳаллага бириктирилган масъуллар орқали ёшлар билан ишлаш, уларни бирлаштириш, тадбирлар ўтказиш, шунингдек, совет даврининг ишламаган механизмларини қўллашга ҳаракат қилинди, — дейди мутахассис.
Кўрсатувни тўлиқ тарзда “Дарё”нинг YouTubeъдаги саҳифаси орқали томоша қилиш мумкин.
Изоҳ (0)