9-fevral kuni “Vaqf” xayriya jamoat fondi eng zarur narsalarni Turkiyaga gumanitar yordam to‘plash markaziga topshirdi, deb xabar bermoqda O‘zbekiston musulmonlari idorasi.
Ma’lum qilinishicha, 2-3 kun ichida turk xalqi uchun Toshkent shahrida 80 tonnadan ortiq yordam yig‘ilgan.
“Vaqf” xayriya jamoat fondi 4 ta yuk mashinaga ortilgan 30 turdagi 10 mingga yaqin ust-bosh va zarur jihozlarni homiylar ko‘magida jamlab, poytaxtdagi yordam yig‘ish markaziga topshirgan. Mazkur yordam tarkibida asosan qishki kiyimlar, yotoq ashyolari va isitish moslamalari mavjud.
Insonparvarlik yuklari ortilgan birinchi reys 10-fevral kuni Turkiyaga uchib ketgan.
Eslatib o‘tamiz, 11-fevral kuni O‘zbekistondan zilzila sabab jabr ko‘rgan Turkiyaga insonparvarlik yordami yig‘ish vaqtincha to‘xtatildi. Bunga kelib tushayotgan yuklarni saralash, qadoqlash va jo‘natishga qo‘shimcha vaqt talab etilayotgani sabab bo‘lgan.
Izoh (0)