Turkiyaning Qahramanmarash viloyatida dahshatli zilzilalardan 96 soat o‘tib, vayronalar ostidan suriyalik yosh qiz qutqarib olindi, deb xabar bermoqda Anadolu.
Milliy tibbiy qutqaruv guruhi xodimlari, politsiya va mahalliy ma’muriyat uch qavatli bino vayronalarini qazishda ishtirok etgan. 14 soatlik sa’y-harakatlardan so‘ng, Suriyada tug‘ilgan 26 yoshli Fatma Karush beton bloklar ostidan chiqarib olindi. Jabrlanuvchi kasalxonaga yotqizildi.
6-fevral, dushanba kuni Turkiyaning janubi-sharqida magnitudasi yetti balldan ortiq bo‘lgan ikkita zilzila (Toshkent vaqti bilan 06:17 da – 7,7 ball va 15:24 da – 7,6 ball) sodir bo‘ldi.
Zilzila qo‘shni Suriyaga ham qattiq ta’sir qildi. Ikki mamlakatda tabiiy ofat qurbonlari soni bugungacha 21 ming kishidan oshdi.
Turkiya prezidenti Rajab Toyyib Erdo‘g‘on mamlakatda tabiiy ofat qurbonlari xotirasiga yetti kunlik milliy motam e’lon qildi. Turkiya davlat bayroqlari butun mamlakat bo‘ylab yarim tushirilgan holatda bo‘ladi.
Vayronkor zilzila boshqa qo‘shni mamlakatlarda, jumladan, Livan, Shimoliy Kipr Turk respublikasi, Gretsiya Kipri va Iroqda ham sezildi.
Izoh (0)