Ukraina armiyasi janglarning shiddatli borishi tufayli snaryadlar taqchilligiga duch kelmoqda, ular “juda tez tugamoqda”, dedi Ukraina prezidenti ofisi rahbarining o‘rinbosari Igor Jovkva Bloomberg telekanali efirida.
Uning qayd etishicha, Ukraina Qurolli kuchlari odatda artilleriya o‘qlaridan boshlanadigan qarshi hujumga o‘tish uchun nafaqat uzoq masofaga mo‘ljallangan artilleriya, havo hujumiga qarshi mudofaa tizimlari, qiruvchi samolyotlar va jangovar tanklar, balki G‘arb o‘q-dorilarini ham olishi kerak.
“Sizda artilleriya bor, juda ko‘p snaryadlar bor. Hozir bizda o‘q-dorilar deyarli nolga teng”, — dedi Jovkva.
U qiruvchilar ham bir qancha sabablarga ko‘ra zarurligini ta’kidladi, jumladan, ular “Ukraina osmonida tobora ko‘proq paydo bo‘layotgan” ballistik raketalarni tutishda muhim.
AQSH davlat kotibi Entoni Blinken fevral oyi boshida Ukraina Qurolli kuchlari o‘zini o‘zi samarali mudofaa qilishi va Rossiya pozitsiyalariga qarshi yangi hujum uyushtirishi uchun Ukrainaga yetkazib beriladigan ta’minot turlarini ko‘rib chiqayotganini aytgandi. “Urushning borishi o‘zgargan sari biz ko‘rsatayotgan yordam ham o‘zgaradi”, — deb tushuntirdi u. Shundan so‘ng NATO bosh kotibi Yens Stoltenberg alyans Rossiyaning tinch muloqot o‘tkazish istagini hozircha ko‘rmayotganini va shuning uchun Kiyevga hududlarini qaytarib olish va suveren davlat bo‘lib qolishiga yordam berishini ta’kidladi.
So‘nggi haftalarda Ukraina rasmiylari Donbassda shiddatli janglar davom etayotgani haqida bir necha bor xabar berdi. “Donetsk viloyatida juda qiyin, shiddatli janglar bormoqda. Ammo bu qanchalik og‘ir bo‘lmasin va qanday bosim bo‘lmasin, biz chidashimiz kerak”, — degandi Ukraina prezidenti Vladimir Zelenskiy fevral oyi boshida.
Izoh (0)