Zelenskiy tanklardan keyin G‘arbdan samolyot va raketalar olishni ham kutayotganini aytdi

G‘arb davlatlari Kiyevga tanklar yetkazib berilishi haqida e’lon qilgach, Ukraina prezidenti Vladimir Zelenskiy mamlakat ulardan uzoq masofaga uchuvchi raketalar va jangovar samolyotlar ham olishi kerakligini aytdi.

“Bugun (25-yanvar) NATO bosh kotibi Yens Stoltenberg bilan gaplashdim. Ukraina uchun uzoq masofaga uchuvchi raketalar yetkazib berish yo‘lagini ham ochishimiz kerak, muhimi — artilleriya sohasida hamkorlikni kengaytirishimiz zarur, Ukraina uchun ta’minotga samolyotlarni ham kiritishimiz kerak. Bu orzuyimiz, bu vazifamiz”, — dedi u Telegram kanalida e'lon qilingan videomurojaatda.

Oldinroq Zelenskiy Stoltenberg bilan Ukraina uchun yangi turdagi qurollar yetkazib berishda to‘siqlarni olib tashlash masalasini muhokama qilganini aytgandi.

25-yanvar kuni AQSH hukumati Kiyevga 31 ta M1 Abrams tanklarini topshirishini ma’lum qildi. O‘z navbatida, Germaniya hukumati ham Ukrainaga Germaniya qurolli kuchlari zaxirasidan 14 ta Leopard 2 tankini jo‘natishi va boshqa davlatlarga reeksport uchun ruxsat berishini tasdiqladi. Shu kuni Norvegiya va Slovakiya Mudofaa vazirligi ham tanklarni Ukrainaga o‘tkazish niyati borligini ma’lum qildi. Avvalroq Kiyevni tanklar bilan ta’minlash qarori Buyuk Britaniya, Fransiya va Polsha rasmiylari tomonidan e’lon qilingandi.