Seshanba, 7-fevral kungi savdolarda Brent neftining aprel fyucherslari narxi bir barrel uchun 82 dollardan oshdi. Bu haqda Intercontinental Exchange ma’lumotlariga tayanib, “Gazeta.ru” xabar bermoqda.
Savdo boshlanganidan beri Brent neft narxi 1 foizga oshib, bir barrel uchun 82,87 dollargacha yuqoriladi.
Brent — Shimoliy dengizdagi 19 ta neft konlaridan olingan xomashyo aralashmasidan tayyorlanadigan nisbatan yengil xom neftga berilgan nom.
“Neft 6-fevralda bir barrel uchun 79 dollardan qimmatlashdi. Narxlarga Turkiyaning Jeyhan eksport terminaliga neft yetkazib berish to‘xtatilgani sababli taklifdagi mumkin bo‘lgan o‘zgarishlar ta’sir ko‘rsatmoqda. Ta’minotning to‘xtatilishi Turkiyadagi eng kuchli zilzilalar tufayli sodir bo‘ldi”, — deyiladi maqolada.
Bir kun avval Turkiyada so‘nggi 100 yildagi eng kuchli zilzilalardan biri sodir bo‘ldi. Zilzila epitsentri mamlakat janubi-sharqidagi Gaziantep shahriga to‘g‘ri keldi. Keyinchalik boshqa mintaqada yana bir kuchli zilzila sodir bo‘ldi.
So‘nggi ma’lumotlarga ko‘ra zilzila oqibatida halok bo‘lganlar soni 3,5 mingga yaqinlashgan.
Izoh (0)