O‘zbekistonda 2022-yil yakunlari bo‘yicha aholiga ajratilgan ipoteka kreditlari 14,4 trln so‘mni tashkil etdi. Bu haqda Markaziy bank hisobotidan ma’lum bo‘ldi.
-30.jpg)
Qayd etilishicha, ipoteka kreditlarining aholiga ajratilgan jami kreditlar qoldig‘idagi ulushi 46 foizga yetgan (2021-yilda 35,8 foiz).
2022-yilda ajratilgan ipoteka kreditlarida Moliya vazirligi mablag‘larining ulushi 2021-yildagi 92,1 foizdan 73,7 foizgacha pasaygan bo‘lsa, bank mablag‘larining ulushi esa 9 foizdan 26,3 foizgacha oshdi.
Bunda, “Yangi tartib” doirasida ajratilgan kreditlar ulushi 2021-yildagi 49,5 foizdan 59,2 foizgacha o‘sgan.
Mazkur davrda ajratilgan jami ipoteka kreditlarining 10,8 trln so‘mi yoki 75 foizi (ipoteka shartnomalari soniga nisbatan) yangi uylarni, 3,6 trln so‘mi yoki 25 foizi eski uylarni sotib olishga yo‘naltirilgan.
Shuningdek, 2022-yilda notarius idoralari tomonidan jami tasdiqlangan uy-joy oldi-sotdi shartnomalar soni 250,3 mingtani tashkil etgan.
Shundan 70,9 mingtasi yoki jami oldi-sotdi shartnomalarning 28 foizi ipoteka kreditlari hisobidan moliyalashtirilgan shartnomalar hissasiga to‘g‘ri keladi.
2023-yil 1-yanvar holatiga ko‘ra ipoteka krediti qoldig‘i tarkibida 15 yilgacha ajratilgan ipoteka kreditlarining ulushi o‘tgan yilning mos davriga nisbatan 6,7 foiz bandga kamayib, 18,8 foizni tashkil etgan bo‘lsa, 20 yilgacha ajratilgan kreditlarning ulushi 68,3 foizdan 73,4 foizgacha oshgan.
Mazkur o‘sish tendensiyasi bevosita so‘nggi yillarda “Yangi tartib” doirasida aholiga 20 yil muddatgacha ajratilayotgan ipoteka kreditlari salmog‘ining muttasil o‘sib borayotganligi bilan izohlash mumkin.
Izoh (0)