Filippinlik iste’molchilar piyoz qimmatligi tufayli uni xarid qilmay qo‘ygan. Bu haqda EastFruit xabar bermoqda.
-27.jpg)
Osiyoning bu mamlakatida piyozning bir kilogrammi qariyb 15 dollardan sotilmoqda, bu go‘shtdan ham qimmatroq.
Ta’kidlanishicha, piyoz to‘ylarga sovg‘a sifatida olib borilyapti, uni hatto kelinlarning guldastasini yasashda ham qo‘llashmoqda.
Taqchil piyoz to‘lov vositasiga ham aylangan: Flippin poytaxti Maniladagi mebel do‘konlaridan birida xaridorlarga fevral oyida to‘lovni piyoz bilan amalga oshirish taklif etilgan.
Ba’zi restoranlar o‘z menyusidagi taomlar tarkibidan asosiy ingrediyentlardan biri bo‘lmish piyozni chiqarib tashlagan, ko‘pchilik oilalar esa uni xarid qilmay qo‘ygan.
Rasmiy ma’lumotlarga ko‘ra, har bir filippinlik yiliga o‘rtacha 2,34 kg piyoz iste’mol qiladi va nazariy jihatdan mamlakatda ushbu talabni qondirish uchun yetarlicha mahsulot yetishtiriladi.
Ammo tropik iqlim bu ekinni yiliga bir marta ekish imkonini bergani sababli, zaxiralar yangi hosildan ancha avval tugaydi yoki kelgusi hosilga qadar mahsulot sifati buziladi.
O‘tgan yili Filippinga super to‘fonlar kelib, ekinlarni nobud qilgan edi. Noto‘g‘ri rejalashtirish piyoz importi kechikishiga olib keldi.
Mahalliy treyderlar ham bunga o‘z hissalarini qo‘shib, piyozni to‘plash va uni qayta sotish orqali bozorni manipulyatsiya qilishdi.
Izoh (0)