“Sakkiz yil o‘qigan aktyordan telefonda vayn oladiganlar mashhurroq”. Dilbar va Umid Zokirovlar vaynerlik faoliyati haqida (video)

“Daryo” kanalining YouTube’dagi kanaliga rejissor Umid Zokirov turmush o‘rtog‘i aktrisa Dilbar Zokirova bilan birgalikda intervyu berdi. Ular suhbat davomida onasi O‘zbekistonda xizmat ko‘rsatgan artist Ra’no Zokirova ko‘pchilikning keskin tanqidlariga uchrayotgan vaynerlik faoliyatiga qanday munosabat bildirayotgani haqidagi savolga quyidagicha javob berishdi. 

— Onam avvaliga videolarimizga ijobiy munosabat bildirayotgandi. Ammo ba’zi YouTube kanallari videolarimizni negativlarga sabab bo‘ladigan sarlavhalar bilan o‘zlariga joylashmoqda. Ko‘chada vayn suratga olsak, “Zokirovlar sulolasi ko‘chada qoldi” deb sarlavha qo‘yishganidan keyin bu kuzatuvchilarning tanqidlariga sabab bo‘lyapti. Onam internetdan kam foydalanadi, fikrlarni o‘qishga-ku, deyarli vaqti yo‘q. Ammo yaqinda videolarimizning biriga birdirilgan keskin fikrlarni o‘qib, “Shu videolarni olmay qo‘yaqolinglar”, dedi. Hatto bir hafta kayfiyati bo‘lmay yurdi. “Dunyoda yaxshi insonlarga ham negativ munosabat bildiradiganlar bor. Ularning oldida biz kim bo‘libmiz”, deganimdan keyin videolarni suratga olishimga ruxsat tegdi, — deydi Umid Zokirov.

Sankt-Peterburgdagi institutda rejissorlik bo‘yicha tahsil olgan Umid Zokirov hozirgi kunda O‘zbekistonda aktyorlarga nisbatan vaynerlar mashhurroq ekanligi haqida aytib o‘tdi. 

— Ilgari vaynerlar ijodiga munosabatim u qadar yaxshi emas edi. Ammo hozirgi kunda butunlay aksi bo‘lib qolgan. O‘zbekistonda professional aktyorlarga nisbatan vayner va blogerlarning mashhurlik darajasi yuqori bo‘lib qolgan. Bitta filmni suratga olish uchun bir necha oy tayyorgarlik ko‘riladi, rejissordan tashqari, operator va aktyorlar jamoasi mehnat qilishadi. Ammo olingan film YouTube’da u qadar ko‘p ko‘rilmaydi. Vaynerlarning telefonda olingan videolari esa 1-2 million marta tomosha qilinadi. Hozirgi kunda internet orqali mashhur bo‘lish juda oson. Nafaqat mashhur bo‘lish, bundan yaxshigina mablag‘ ham topish mumkin. Sakkiz yil davomida aktyorlik bo‘yicha o‘qidim, nechta film suratga oldim, ammo baribir natijalar kutilganidek bo‘lmadi. Shu bois ayolimga oilaviy vaynlar suratga olish taklifini berdim. Tan olish kerak, professionallarning daromadi bilan vaynerlarniki o‘rtasida katta tafovut bor, — deydi Umid Zokirov. 

Turmush o‘rtog‘ining bu fikrlariga aktrisa Dilbar Zokirova ham o‘z munosabatini bildirdi.

— Ilgari aktyorlarga boshqacharoq tarbiya berishgan. Masalan, menga ham “Sen zo‘r aktrisa bo‘lginki, rejissorlarning o‘zi oldingga kelishsin”, deb uqtirishgan. Ammo bu har doim ham o‘zini oqlamaydi. Ijodkor iqtidorini namoyish qilmasa, chekkada qolib ketaveradi. Bu xuddi savdo majmuasidagi chetda qolib ketgan mahsulotga o‘xshaydi. Teatrda shunday zo‘r aktyor va aktrisalarni taniyman. Afsuski, ularni xalq deyarli tanimaydi. 
Hozir tomoshabinlar fikrini inobatga olib, vaynlar suratga olyapmiz. Ammo bu bo‘ldi, endi faqat shu yo‘lda ijod qiladi, degani emas. Odamlarni jalb qilib olgach, professional ijodni davom ettirishimiz mumkin. 
Negativ munosabatlar hamisha bo‘lgan. Ammo “Ering dayusmi, nega seni xalqqa ko‘z-ko‘z qilyapti?” degan gap-so‘zlar asabimni buzyapti. Men avval ham seriallarda suratga tushardim, chunki aktrisalik kasbim, — deydi Dilbar Zokirova.