“Onam aktrisa qizga uylanishimni istadi”. Aktrisa Ra’no Zokirovaning o‘g‘li va kelini bilan suhbat (video)

“Daryo” internet nashrining YouTube’dagi kanaliga Oʻzbekistonda xizmat koʻrsatgan artist Raʼno Zokirovaning oʻgʻli va kelini intervyu berishdi. Dilbar Zokirova “Sensiz” serialidagi roli bilan bilan tomoshabinlarga yaxshi tanish. Oʻgʻli Umid Zokirov esa isteʼdodli rejissorlardan biri hisoblanadi. Ayni kunlarda vaynerlik bilan shugʻullanayotgan yoshlar qanday tanishishgani haqidagi savolga quyidagicha javob berishdi. 

— Hamma qatori sovchi orqali tanishdik. Umid aka ham ijodkor boʻlsa-da, avvaldan tanish boʻlmaganmiz. Ammo qaynonam bilan bir nechta telenovellalarning suratga olinishida birga ishlaganmiz. Oʻzbekona oilada ulgʻayganim uchun katta yoshli insonlarni hurmat qilaman, ustozlarga choy berib, mehmon qilishni yaxshi koʻraman. Raʼno Zokirovaga ham shunday qilgan ekanman. U inson buni kuzatib yurgan ekan. Bir kungi syomkada “Oʻgʻlim rejissor, sizni videoga olaman. Balki, kun kelib hamkorlikda ishlarsizlar”, dedi. “Hoʻp” deb videoga tushib berdim. Ammo maqsad butunlay boshqa boʻlgan ekan, — deydi Dilbar Zokirova. 

Umid Zokirovning aytishicha, onasi uning aktrisa bilan oila qurishini istagan. Buning sababi esa quyidagicha:

— Uylanish yoshiga yetgandan keyin onalar kelin izlashga tushib qolisharkan. Oyim ham syomkaga borsalar yoki koʻcha-kuyda yaxshi qizlarni uchratib qolsa, darrov rasm yoki videosini olib kelardi. Syomkadan qaytgach Dilbarning videosini koʻrsatib, rosa maqtadi. “Qosh-koʻzlari chiroyli, uning ustiga aktrisa. Seni tushunadi, qoʻllab-quvvatlaydi”, dedi. Chunki ijodkorlarning boshqa soha vakili bilan oila qurib, baxtli yashashi bu chinakamiga omad. Chunki koʻp hollarda syomkadan kech qaytsa yoki boshqa aktyorlar bilan ekrandagi munosabatini notoʻgʻri talqin qilishadi. Xullas,  maqtovlarga unchalik eʼtibor bermadim. Ammo videodagi qiz ham hayolimdan ketmadi, — deydi Umid Zokirov. 

Dilbar Zokirova turmush oʻrtogʻini ilk marta uchratganda koʻnglidan nimalar oʻtgani va titragan menyu voqeasi haqida soʻzlab berdi. 

— Ilk uchrashuvda oʻzimizni xotirjamdek tutishga harakat qilganmiz. Menimcha, bu ishni hammadan ham koʻra men uddalaganman. Oyijon. Umid akam va men ovqatlanishga kirdik. “Onalari mashhur aktrisa, boʻlar ham oʻzlaricha manman”, boʻlsa kerak deb hayolimdan oʻtkazgandim. Ammo menyudan ovqat tanlash arafasida uning tinimsiz titrayotgani eʼtiborimni tortdi. Bir u kishining, bir oʻzimning qoʻlimga qarayman. Menda hech qanday oʻzgarish yoʻq. Ichimda oʻz-oʻzimni koyidim. Chunki odamda uchrashuvga chiqqanda qizlar uyalib, hayajonlanishi kerak. Bizda esa aksi boʻldi. Mana shundan keyin toʻy haqida oʻylab koʻrishga qaror qildim. Chunki hozirgi kunda bunday yigitlar juda kam, — deydi Dilbar Zokirova.