“Саккиз йил ўқиган актёрдан телефонда вайн оладиганлар машҳурроқ”. Дилбар ва Умид Зокировлар вайнерлик фаолияти ҳақида (видео)

“Дарё” каналининг YouTube’даги каналига режиссёр Умид Зокиров турмуш ўртоғи актриса Дилбар Зокирова билан биргаликда интервью берди. Улар суҳбат давомида онаси Ўзбекистонда хизмат кўрсатган артист Раъно Зокирова кўпчиликнинг кескин танқидларига учраётган вайнерлик фаолиятига қандай муносабат билдираётгани ҳақидаги саволга қуйидагича жавоб беришди. 

— Онам аввалига видеоларимизга ижобий муносабат билдираётганди. Аммо баъзи YouTube каналлари видеоларимизни негативларга сабаб бўладиган сарлавҳалар билан ўзларига жойлашмоқда. Кўчада вайн суратга олсак, “Зокировлар сулоласи кўчада қолди” деб сарлавҳа қўйишганидан кейин бу кузатувчиларнинг танқидларига сабаб бўляпти. Онам интернетдан кам фойдаланади, фикрларни ўқишга-ку, деярли вақти йўқ. Аммо яқинда видеоларимизнинг бирига бирдирилган кескин фикрларни ўқиб, “Шу видеоларни олмай қўяқолинглар”, деди. Ҳатто бир ҳафта кайфияти бўлмай юрди. “Дунёда яхши инсонларга ҳам негатив муносабат билдирадиганлар бор. Уларнинг олдида биз ким бўлибмиз”, деганимдан кейин видеоларни суратга олишимга рухсат тегди, — дейди Умид Зокиров.

Санкт-Петербургдаги институтда режиссёрлик бўйича таҳсил олган Умид Зокиров ҳозирги кунда Ўзбекистонда актёрларга нисбатан вайнерлар машҳурроқ эканлиги ҳақида айтиб ўтди. 

— Илгари вайнерлар ижодига муносабатим у қадар яхши эмас эди. Аммо ҳозирги кунда бутунлай акси бўлиб қолган. Ўзбекистонда профессионал актёрларга нисбатан вайнер ва блогерларнинг машҳурлик даражаси юқори бўлиб қолган. Битта фильмни суратга олиш учун бир неча ой тайёргарлик кўрилади, режиссёрдан ташқари, оператор ва актёрлар жамоаси меҳнат қилишади. Аммо олинган фильм YouTube’да у қадар кўп кўрилмайди. Вайнерларнинг телефонда олинган видеолари эса 1-2 миллион марта томоша қилинади. Ҳозирги кунда интернет орқали машҳур бўлиш жуда осон. Нафақат машҳур бўлиш, бундан яхшигина маблағ ҳам топиш мумкин. Саккиз йил давомида актёрлик бўйича ўқидим, нечта фильм суратга олдим, аммо барибир натижалар кутилганидек бўлмади. Шу боис аёлимга оилавий вайнлар суратга олиш таклифини бердим. Тан олиш керак, профессионалларнинг даромади билан вайнерларники ўртасида катта тафовут бор, — дейди Умид Зокиров. 

Турмуш ўртоғининг бу фикрларига актриса Дилбар Зокирова ҳам ўз муносабатини билдирди.

— Илгари актёрларга бошқачароқ тарбия беришган. Масалан, менга ҳам “Сен зўр актриса бўлгинки, режиссёрларнинг ўзи олдингга келишсин”, деб уқтиришган. Аммо бу ҳар доим ҳам ўзини оқламайди. Ижодкор иқтидорини намойиш қилмаса, чеккада қолиб кетаверади. Бу худди савдо мажмуасидаги четда қолиб кетган маҳсулотга ўхшайди. Театрда шундай зўр актёр ва актрисаларни танийман. Афсуски, уларни халқ деярли танимайди. 
Ҳозир томошабинлар фикрини инобатга олиб, вайнлар суратга оляпмиз. Аммо бу бўлди, энди фақат шу йўлда ижод қилади, дегани эмас. Одамларни жалб қилиб олгач, профессионал ижодни давом эттиришимиз мумкин. 
Негатив муносабатлар ҳамиша бўлган. Аммо “Эринг даюсми, нега сени халққа кўз-кўз қиляпти?” деган гап-сўзлар асабимни бузяпти. Мен аввал ҳам сериалларда суратга тушардим, чунки актрисалик касбим, — дейди Дилбар Зокирова.