Ukraina mudofaa vaziri Aleksiy Reznikov shu hafta iste’foga chiqishi mumkin, deb yozmoqda “Ukrainskaya pravda” Ukraina prezident ofisi, Vazirlar Mahkamasi va huquq-tartibot idoralaridagi manbalariga tayanib.
Nashr suhbatdoshlariga ko‘ra, hozir Vladimir Zelenskiyning jamoasi vazirni qaysi lavozimga o‘tkazish masalasini hal qilmoqda, chunki “Ukraina prezidenti ofisidagi biror kim uning jamoada qolishi kerakligiga shubha qilmayapti”. Ko‘rib chiqilayotgan variantlar orasida Reznikovga Adliya vaziri lavozimini topshirish ham bor — u mutaxassisligi bo‘yicha advokat. 1-fevral kuni Oliy Rada deputati Aleksey Goncharenko ham shu haqda gapirgandi.
Shu bilan birga, Reznikovning iste’foga chiqishi mumkinligi haqida xabar bergan “RBK-Ukraina” manbalari “uning adliya vaziri lavozimiga o‘tishi haqidagi gaplar haqiqatga to‘g‘ri kelmaydi” deb ta’kidlamoqda. Avvalroq Rada deputati Yaroslav Jeleznyak Reznikov Strategik sanoat vazirligiga ishga o‘tishi mumkinligini aytgan.
Ikkala nashr suhbatdoshlarining aytishicha, Ukraina mudofaa vaziri lavozimiga ehtimoliy nomzodlardan biri Bosh razvedka boshqarmasi rahbari Kirill Budanov bo‘lib turibdi.
Reznikovning o‘zi ishdan bo‘shatilishi haqidagi mish-mishlarga quyidagicha izoh berdi:
“Hech qaysi amaldor o‘z kursisida abadiy qolmaydi. Ushbu bosqich tugashiga tayyor turish kerak. Mudofaa vaziri bo‘lish-bo‘lmasligim haqidagi qarorni bir kishi — Ukraina prezidenti Vladimir Zelenskiy qabul qiladi. U tayinlash haqida fikr beradi, Oliy Rada tayinlaydi. Shuning uchun faqat Ukraina prezidenti qarori bilan men muayyan qarorlar qabul qilaman. Va uyog‘iga Zelenskiy menga nimani taklif qilsa, shuni qilaman. G‘alabamiz uchun hamma narsani qilaman. Advokatlik kasbim nafaqat bu urushda g‘alaba qozonish, balki Rossiya harbiylarini jazolash uchun o‘zimga qiziqarli loyihani topaman, degan optimistik fikr beradi”.
Yanvar oyi oxirida Ukrainada korrupsiya mojarolari ortidan bir qancha yuqori martabali amaldorlar ishdan bo‘shatildi. 1-fevral kuni Ukraina Qurolli kuchlari ham amaldorlar, ham tadbirkorlarning uylarida qator tintuvlar o‘tkazdi. Ukraina Mudofaa vazirligi ham janjallardan biriga o‘ralashib qoldi: vazirlik harbiy xizmatchilar uchun oziq-ovqat mahsulotlarini oddiy chakana narxlardan ikki-uch baravar yuqori narxlarda sotib olishda ayblandi. Shu sababli mudofaa vaziri o‘rinbosari Vyacheslav Shapovalov iste’foga chiqdi, shartnomalarni imzolagan vazirlikning davlat xaridlari departamenti direktori Bogdan Xmelnitskiy esa ishdan bo‘shatildi.
Izoh (0)