Украина мудофаа вазири Алексий Резников шу ҳафта истеъфога чиқиши мумкин, деб ёзмоқда “Украинская правда” Украина президент офиси, Вазирлар Маҳкамаси ва ҳуқуқ-тартибот идораларидаги манбаларига таяниб.
Нашр суҳбатдошларига кўра, ҳозир Владимир Зеленскийнинг жамоаси вазирни қайси лавозимга ўтказиш масаласини ҳал қилмоқда, чунки “Украина президенти офисидаги бирор ким унинг жамоада қолиши кераклигига шубҳа қилмаяпти”. Кўриб чиқилаётган вариантлар орасида Резниковга Адлия вазири лавозимини топшириш ҳам бор — у мутахассислиги бўйича адвокат. 1 февраль куни Олий Рада депутати Алексей Гончаренко ҳам шу ҳақда гапирганди.
Шу билан бирга, Резниковнинг истеъфога чиқиши мумкинлиги ҳақида хабар берган “РБК-Украина” манбалари “унинг адлия вазири лавозимига ўтиши ҳақидаги гаплар ҳақиқатга тўғри келмайди” деб таъкидламоқда. Аввалроқ Рада депутати Ярослав Железняк Резников Стратегик саноат вазирлигига ишга ўтиши мумкинлигини айтган.
Иккала нашр суҳбатдошларининг айтишича, Украина мудофаа вазири лавозимига эҳтимолий номзодлардан бири Бош разведка бошқармаси раҳбари Кирилл Буданов бўлиб турибди.
Резниковнинг ўзи ишдан бўшатилиши ҳақидаги миш-мишларга қуйидагича изоҳ берди:
“Ҳеч қайси амалдор ўз курсисида абадий қолмайди. Ушбу босқич тугашига тайёр туриш керак. Мудофаа вазири бўлиш-бўлмаслигим ҳақидаги қарорни бир киши — Украина президенти Владимир Зеленский қабул қилади. У тайинлаш ҳақида фикр беради, Олий Рада тайинлайди. Шунинг учун фақат Украина президенти қарори билан мен муайян қарорлар қабул қиламан. Ва уёғига Зеленский менга нимани таклиф қилса, шуни қиламан. Ғалабамиз учун ҳамма нарсани қиламан. Адвокатлик касбим нафақат бу урушда ғалаба қозониш, балки Россия ҳарбийларини жазолаш учун ўзимга қизиқарли лойиҳани топаман, деган оптимистик фикр беради”.
Январь ойи охирида Украинада коррупция можаролари ортидан бир қанча юқори мартабали амалдорлар ишдан бўшатилди. 1 февраль куни Украина Қуролли кучлари ҳам амалдорлар, ҳам тадбиркорларнинг уйларида қатор тинтувлар ўтказди. Украина Мудофаа вазирлиги ҳам жанжаллардан бирига ўралашиб қолди: вазирлик ҳарбий хизматчилар учун озиқ-овқат маҳсулотларини оддий чакана нархлардан икки-уч баравар юқори нархларда сотиб олишда айбланди. Шу сабабли мудофаа вазири ўринбосари Вячеслав Шаповалов истеъфога чиқди, шартномаларни имзолаган вазирликнинг давлат харидлари департаменти директори Богдан Хмелницкий эса ишдан бўшатилди.
Изоҳ (0)