O‘zbekistonning Madriddagi elchixonasida Ispaniyaning Unincoming Tour SL sayyohlik kompaniyasi bosh direktori, Valensiyadagi Silkway SL Ispaniya—O‘zbekiston savdo va sarmoya uyining rahbari o‘rinbosari Oskar Latso bilan uchrashuv bo‘lib o‘tdi, deb xabar bermoqda “Dunyo” axborot agentligi.
Qayd etilishicha, unda Ispaniyadan O‘zbekistonga to‘g‘ridan to‘g‘ri va charter havo qatnovlarini yo‘lga qo‘yish hamda mamlakatning sayyohlik salohiyatini Ispaniya va Lotin Amerikasi hududlarida targ‘ib etish orqali turistlar oqimini oshirish haqida fikr almashilgan. Buning uchun mutasaddi tashkilotlar, sayyohlik kompaniyalari va ommaviy axborot vositalari vakillari uchun infotur tashkil etish bilan bog‘liq masalalar muhokama qilingan.
17—24-mart kunlari 26 nafardan iborat guruh a’zolari uchun Madrid—Istanbul—Toshkent—Samarqand—Buxoro—Xiva—Urganch—Istanbul—Madrid yo‘nalishi bo‘yicha infotur rejalashtirilgan. Ushbu guruh tarkibidan Ispaniya va Meksika tur-agentlari, blogerlar, yutuberlar, inflyuyenserlar va OAV vakillari joy olgan.
Ma’lumot uchun, Oskar Latso 2022-yil mart oyida amaliy safar bilan O‘zbekistonda bo‘lgan edi.
Izoh (0)