Qoraqalpog‘istonlik Zulayho G‘aniyeva 49 yoshda. U Xo‘jayli tumanidagi “Shag‘alako‘l” mahallasida istiqomat qiladi. To‘rt nafar farzandning onasi va uch nafar nabiraning buvisi bo‘lgan ayol shu vaqtga qadar oila, bola-chaqa, uy-ro‘zg‘or tashvishi bilan tayinli ishga ham kirolmagan. Hechdan ko‘ra kech deganlaridek, nafaqa yoshiga yetgach bedana boqishni yo‘lga qo‘ygan. Ayni kunga kelib esa ishbilarmon ayolga aylandi.
“Daryo” muxbiri Zulayho opani suhbatga tortdi.
Maʼlum bo‘lishicha, hokim yordamchisi tomonidan tavsiya qilingan “Oilaviy tadbirkorlik” dasturi doirasida 33 million so‘m kredit olgan Zulayho opa o‘z tadbirkorligini boshlab yuborgan.
Dastlab tovuq olib tadbirkorlik qilishni niyat qilgan Zulayho G‘aniyeva bu fikridan qaytgan. Tovuq 10 kun tuxum qo‘yib, bir hafta “dam olishini” bilgan opa har kuni tuxum qo‘yuvchi bedanalarni boqishga qaror qilgan.
Qayd etilishicha, Qoraqalpog‘istonda ayni kunga qadar ham bedana boqish rivojlanmagan. Nukusda endigina ko‘zga tashlangan soha, Xo‘jayli tumanida deyarli yo‘q hisobida.
Zulayho aya bedanalariga o‘ziga xos eʼtibor qaratadi. U 1000 dan ortiq bedanalariga mayin musiqa qo‘yib beradi. Va musiqa sadolari ostida issiq kunlarida minglab tuxum sanab oladi.
“Bu jonivorlar stressga beriluvchan ekan. Salgina shovqinga qo‘rqib qoladi. Shuning uchun mayin, tabiat musiqalarini qo‘yib beraman. Agar bedana qo‘rqib stressga berilsa, tuxum tug‘ishiga taʼsir qiladi. Bu esa daromadga taʼsir qiladi. Hozir yomon emas. 1000 ga yaqin bedanadan kuniga 250-300 ga yaqin tuxum olamiz. Ularning donasini 500 so‘mdan sotaman. Nevaralarim, turmush o‘rtog‘im yeyishadi. Kasal bo‘lishmaydi — juda foydali. Yozga, issiq kunlarga chiqib ketsak, kuni 1000 ta tuxum ham olish mumkin”, — deydi Zulayho G‘aniyeva.
Izoh (0)