Braziliya sobiq prezidenti Jair Bolsonaru AQSHning olti oylik turist vizasini olish uchun ariza topshirdi. Bu haqda sobiq davlat rahbarining advokati Felipe Aleksandr ma’lum qildi.
“U (Jair Bolsonaru) dam olib, boshini shamollatmoqchi, keyingi qadamlar qanday bo‘lishini hal qilishdan oldin u bir necha oy davomida AQSHda sayyoh sifatida hayotdan zavqlanishni istamoqda”, — dedi advokat.
Advokatning aniqlik kiritishicha, Vashington Bolsonaruning arizasini 27-yanvar, juma kuni qabul qilgan, ariza ko‘rib chiqilayotgan vaqtda sobiq prezident AQSHda bo‘lib turibdi.
Bolsonaru tarafdorlari 8-yanvar kuni Braziliya poytaxtida 2022-yilgi prezidentlik saylovlari natijalarini qayta ko‘rib chiqishni talab qilib, namoyish uyushtirgandi. Saylovda Braziliyaning amaldagi prezidenti Lula da Silva 50,8 foiz, Bolsonaru esa 49,2 foiz ovoz olgan. Namoyishchilar maʼmuriy binolar, jumladan, Oliy sud, prezident qarorgohi va Milliy Kongress binosiga bostirib kirdi. Shaharda favqulodda holat e’lon qilindi, 1,5 mingdan ortiq odam hibsga olindi.
Bolsonaru namoyishchilarni qoralagan bo‘lsa-da, Braziliya sudi uni tartibsizliklarni tergov qilishda ayblanuvchilar ro‘yxatiga kiritdi. Prokuratura maʼlumotlariga koʻra, sobiq prezident “jamiyatni jinoyatga undash harakatini sodir etgan”.
Braziliyaning amaldagi prezidenti Silva Bolsonaruning mamlakatni tark etishiga munosabat bildirar ekan, bu xuddiki siyosatchi bo‘lajak tartibsizliklardan xabardor bo‘lgandek taassurot qoldirishini aytdi.
Izoh (0)