AQSHning iste’fodagi generali Jek Kin Qo‘shma Shtatlarda Xitoy bilan urush olib borish uchun yetarlicha tayyorgarlik yo‘qligini tan oldi. Uning so‘zlarini Newsweek nashri keltirmoqda.
“Haqiqat va diqqat qilishimiz kerak bo‘lgan narsa shundaki, biz (Xitoy bilan urushga) yetarlicha tayyor emasmiz. Mintaqada samarali harbiy tiyib turuvchi kuchlarimiz yo‘q. Xitoyning kemalari, samolyotlari va raketalari AQSHnikidan ko‘p”, — dedi u.
Bundan tashqari, Kin Kongress Tayvanga XXRdan hujum bo‘lgan taqdirda orolni himoya qilishi kerakligini ta’kidladi. “Vashington 19 milliard dollarlik uskunalarni haligacha jo‘natgani yo‘q”, — dedi iste’fodagi general.
“Tayvanga yordam berishimiz kerak va o‘z muammomizni o‘zimiz hal qilishimiz kerak. Bu diqqat qaratishimiz kerak bo‘lgan narsa. Keling, xavfni bartaraf qilaylik va tayyorgarlik ko‘raylik, aynan shu tariqa urushning oldini olamiz. Biz urushga tayyor bo‘lish orqali uning oldini olamiz”, — deya qo‘shimcha qildi Kin.
Bundan tashqari, u AQSH—Xitoy urushini muqarrar deb hisoblamasligini aytdi. Uning fikricha, bu yaqin kelajakda sodir bo‘lmaydi, ammo harbiy mojaro yuz berishi istisno emas.
Eslatib o‘tamiz, avvalroq AQSH armiyasi ikki yildan keyin Xitoy bilan urush boshlanishi mumkinligi haqida ogohlantirilgandi. Harbiy havo kuchlari generali Mayk Minixan bu haqda qo‘l ostidagi ofitserlarga xabar yuborgan.
Izoh (0)