Бразилия собиқ президенти Жаир Болсонару АҚШнинг олти ойлик турист визасини олиш учун ариза топширди. Бу ҳақда собиқ давлат раҳбарининг адвокати Фелипе Александр маълум қилди.
“У (Жаир Болсонару) дам олиб, бошини шамоллатмоқчи, кейинги қадамлар қандай бўлишини ҳал қилишдан олдин у бир неча ой давомида АҚШда сайёҳ сифатида ҳаётдан завқланишни истамоқда”, — деди адвокат.
Адвокатнинг аниқлик киритишича, Вашингтон Болсонарунинг аризасини 27 январь, жума куни қабул қилган, ариза кўриб чиқилаётган вақтда собиқ президент АҚШда бўлиб турибди.
Болсонару тарафдорлари 8 январь куни Бразилия пойтахтида 2022 йилги президентлик сайловлари натижаларини қайта кўриб чиқишни талаб қилиб, намойиш уюштирганди. Сайловда Бразилиянинг амалдаги президенти Лула да Сильва 50,8 фоиз, Болсонару эса 49,2 фоиз овоз олган. Намойишчилар маъмурий бинолар, жумладан, Олий суд, президент қароргоҳи ва Миллий Конгресс биносига бостириб кирди. Шаҳарда фавқулодда ҳолат эълон қилинди, 1,5 мингдан ортиқ одам ҳибсга олинди.
Болсонару намойишчиларни қоралаган бўлса-да, Бразилия суди уни тартибсизликларни тергов қилишда айбланувчилар рўйхатига киритди. Прокуратура маълумотларига кўра, собиқ президент “жамиятни жиноятга ундаш ҳаракатини содир этган”.
Бразилиянинг амалдаги президенти Сильва Болсонарунинг мамлакатни тарк этишига муносабат билдирар экан, бу худдики сиёсатчи бўлажак тартибсизликлардан хабардор бўлгандек таассурот қолдиришини айтди.
Изоҳ (0)