“Putin urushda g‘alaba qozonishiga ishonar ekan, muzokaralar stoliga o‘tirmaydi” — Stoltenberg

NATO bosh kotibi Yens Stoltenberg Rossiya prezidenti Vladimir Putin Ukrainaga qarshi urush borasidagi maqsadlarini o‘zgartirmagani, aksincha yangi hujumga hozirlik ko‘rayotganini aytdi.

Stoltenberg Janubiy Koreya poytaxti Seuldagi CHeY malaka oshirish institutida so‘zlagan nutqida bu haqda gapirdi.

“Bugun hech kim urush qachon tugashini aytolmaydi. Lekin shuni aniq bilamizki, agressiv urush Putin tomonidan qo‘zg‘atilgan. Aynan u boshqa davlatga, Yevropadagi suveren demokratik davlatga bostirib kirishga qaror qilgan va bugungi kunda urushni to‘xtatishi mumkin. Ammo muammo shundaki, u va Moskva rasmiylari tinchlikka tayyorlanayotgani haqida hech qanday belgi ko‘rmayapmiz”, — deb tushuntirdi Stoltenberg.

NATO bosh kotibi Rossiya harakatlarida yangi hujumga tayyorgarlik aks etayotgani, chunki tobora ko‘proq askarlar safarbar qilinib, qurol va o‘q-dorilar soni faol ravishda ko‘payayotganini aytdi. Stoltenberg Shimoliy Koreya va Eron Rossiyaga ta’minot arsenalini to‘plashda yordam berayotganini ta’kidladi.

“Eng muhimi, prezident Putinning ushbu bosqindan umumiy maqsadini ko‘rmayapmiz. Shunday ekan, biz uzoq yo‘lga tayyor bo‘lishimiz kerak”, — dedi Yens Stoltenberg.

Shuningdek, u Putinning urushda g‘alaba qozonishiga yo‘l qo‘ymaslik muhimligini ta’kidladi, aks holda bu nafaqat ukrainaliklar, balki butun sivilizatsiyalashgan dunyo uchun fojia bo‘lishini qayd etdi.

“Shuning uchun Ukrainani qo‘llab-quvvatlashda davom etishimiz juda muhim. Men NATO ittifoqchilari, hamkorlari va Koreyaning qo‘llab-quvvatlashini olqishlayman va bunga tayyor bo‘lishimiz kerak”, — dedi Stoltenberg.

NATO bosh kotibining aytishicha, bu urush qaysidir nuqtada muzokaralar stolida tugashi mumkin.

“Ammo biz biladigan narsa shundaki, muzokara stolda sodir bo‘layotgan voqealar va jang maydonidagi vaziyatga to‘liq bog‘liqdir. Shuning uchun agar haqiqatan ham Ukraina Yevropada suveren, mustaqil davlat sifatida g‘alaba qozonishini istasak, hozir uni qo‘llab-quvvatlashimiz kerak.

Putin jang maydonida g‘alaba qozonishiga ishonar ekan, u muzokaralar stoliga o‘tirmaydi. Demak, paradoks shundaki, aslida Ukrainani harbiy qo‘llab-quvvatlash urushni tinch muzokaralar yo‘li bilan hal qilishga erishishning eng yaxshi yo‘lidir”, — dedi u.

Mavzuga doir:

• NATO Ukrainadagi urushni tezda tugatishi mumkin, ammo bunday qilolmasligi sababi tushuntirildi
• NATO admirali alyans Rossiya bilan to‘g‘ridan to‘g‘ri to‘qnashuvga tayyorligini aytdi