Xitoy AQSH chiplaridan foydalangan holda atom qurollari yaratmoqda — WSJ

Xitoyning yadroviy qurol bo‘yicha tadqiqot olib boruvchi instituti sanksiyalarga qaramay, uzoq vaqtdan beri AQSHda ishlab chiqarilgan kompyuter chiplarini ishlatib kelmoqda. Bu haqda The Wall Street Journal xabar berdi.

Nashrning ma’lum qilishicha, 1997-yildan beri sanksiyalar ostida bo‘lgan va yadro qurolini yaratish bilan shug‘ullangan Xitoy muhandislik fizikasi akademiyasi Intel va Nvidia kompaniyalaridan yarimoʻtkazgich chiplarini xarid qilgan. Bunday xaridlar kamida 2020-yildan beri amalga oshirilib kelingan.

Jurnalistlar Amerika chiplari Xitoyning o‘zida vositachilik yo‘li bilan sotib olinganini aniqladi. Xususan, akademiya o‘lchamlari 7 dan 14 nanometrgacha bo‘lgan chiplarni xarid qilgan, bunday chiplar Xitoyda ishlab chiqarilmaydi. Ularni Xitoyning savdo maydonchalarida osongina sotib olish mumkin.

“Ushbu xaridlar AQSH tomonidan o‘rnatilgan uzoq muddatli cheklovlarga zid. Mazkur cheklov Amerika mahsulotidan xorijiy davlatlar tomonidan atom quroli sohasidagi tadqiqotlar uchun foydalanishning oldini olishga qaratilgandi”, — ta’kidladi nashr.

Amerikalik ishlab chiqaruvchilar dunyoning turli mamlakatlarida juda ko‘p sonli kompyuterlar sotilganini aytdi. Shaxsiy kompyuterlarning oxirgi xaridori kim bo‘lishini nazorat qilish esa imkonsizligini bildirdi.

Ma’lumot o‘rnida, 2022-yil avgust oyida AQSH prezidenti ma’muriyati Rossiya va Xitoyga kompyuter chiplarini sotishni cheklagandi.