IT Park 16 yoshida Mohirdev kompaniyasida frontend-dasturchi bo‘lib ishlayotgan maktab o‘quvchisi haqida hikoya qildi.
Usmonov Alisher Buxoro viloyati Jondor tumanida tug‘ilgan. Hozirda tumandagi 31-sonli maktabning 9-sinf o‘quvchisi.
1,5 yildan buyon Mohirdev kompaniyasida junior Frontend dasturchi sifatida ishlab kelmoqda.
IT-sohasiga bo‘lgan qiziqish dastlab Android qurilmalar uchun ishlab chiqiladigan ilovalarni o‘rganishdan boshlangan. Shuningdek robototexnika va ilovalar yasashga bo‘lgan intilish ham dasturchi bo‘lishga turtki bo‘lgan.
Alisher dasturchilikni o‘rganishni boshlamoqchi bo‘lganda o‘quv kurslarini topish biroz qiyinchilik tug‘dirgani, onlayn darslar esa amaliyot o‘rnini bosa olmaganini qayd etdi.
Dasturchilikka kirib kelganiga ko‘p bo‘lmagan bo‘lsa-da, u oxirgi 6 oy ichida 3 ta yirik loyihani muvaffaqiyatli tamomlagan va o‘z ishini davom ettirib kelmoqda.
Hozirda barcha dasturchilar singari biror masala yuzaga kelganda uning yechimini topishda qiynalishi va buni hal etish uchun ko‘proq tajriba to‘plashi kerakligini aytib o‘tdi.
Alisher bunda jamoa bilan ko‘proq ishlash kerakligi, senior dasturchilar bilan muloqot qilib, ularning ishlash tartibi va masalani yechishda qanday usullarda foydalanishini o‘rganish zarurligini ta’kidladi. Uning oylik daromadi 300 dollardan boshlanadi.
Kelajakda Google, Amazon, Uber kabi yirik kompaniyalarda ishlash bilan bir qatorda, ushbu sohaga ixtisoslashgan o‘zining shaxsiy kompaniyasiga asos solishni orzu qiladi.
Alisher o‘zining misolida ishtiyoqi bo‘lgan har qanday inson IT mutaxassisi bo‘lishi mumkinligini ko‘rsatib bermoqda. Asosiysi — intilish, mehnat qilish va o‘rganishga bo‘lgan qiziqishdir.
Izoh (0)