Barbod bo‘lgan karyera va qimmatga tushgan ajrim: xiyonati kutilmaganda fosh bo‘lgan milliarderlar

Yaqinda Coldplay guruhining konsertida yuz bergan holat ijtimoiy tarmoqlarda yashindek tarqaldi. Milliarder Endi Bayron shouga rafiqasi emas, balki sevgilisi — kadrlar bo‘limi rahbari Kristin Kabot bilan tashrif buyurdi. Bu “sarguzasht” sirligicha qolishi mumkin edi, ammo konsert paytida tasodifan juftlik kamerga tushib qoldi va bir-birini quchoqlab turgan vaqtida jonli efirda ko‘rsatildi.

Videorolik qisqa fursatda tarqalib, millionlab marta tomosha qilindi. Natijada Bayron nafaqat ishidan, balki oilasidan ham ayrildi — uning rafiqasi ajrim uchun ariza berdi. Xuddi shunday taqdir Kristin Kabotni ham kutmoqda: eri bunday ochiq-oydin xiyonatni kechira olmadi. Butun dunyoga ma’lum bo‘lgan ushbu voqea o‘tmishda jamoatchilik e’tiborini tortgan boshqa yirik mojarolarni ham eslatib yubordi. Quyida xiyonati qimmatga tushgan uch nafar milliarder haqida so‘z boradi.

Bill Geyts — 27 yillik nikohning tugashiga sabab bo‘lgan xiyonat

Microsoft asoschisi Bill Geyts uzoq yillar namunali oila boshlig‘i sifatida ko‘rilgan. Uning Melinda French bilan rishtalari mustahkamdek tuyulgan, ammo 2021-yil ular ajrashganini e’lon qildi. Rasmiy sababi ochiqlanmagan bo‘lsa-da, OAV oradan ko‘p o‘tmay buning tagiga yetdi.

Ma’lum bo‘lishicha, Geyts 2000-yillarda Microsoft’dagi bir xodim bilan yaqin munosabatda bo‘lgan. Oradan yillar o‘tib, 2020-yilda o‘sha ayol kompaniya direktorlar kengashiga xat yo‘llab, bo‘lgan voqealarni bayon etgan. Ayol Geytsning rafiqasi Melindaga ham bu haqda xabar yetkazish kerakligini talab qilgan. Oradan ko‘p o‘tmay, juftlik ajrashgan, chunki Melinda bu munosabatni kechira olmagan.

Ajrim Geytsga 5 milliard dollarga tushdi. Moliyaviy yo‘qotishdan tashqari, uning obro‘si ham jabr ko‘rdi.

Ilon Mask: tugamas sevgi mojarolari va sir tutiladigan farzandlar

Tesla va SpaceX rahbari Ilon Mask doimiy ravishda OAV diqqat markazida bo‘lgan. Uning shaxsiy hayoti esa tartibsizlik va mojaro bilan to‘la. 2022-yilda Business Insider jurnali Neuralink kompaniyasi operatsion direktori Shivon Zilisdan Maskning farzandi borligini fosh qildi. Bu holat bir yildan ortiq yashirilgan edi.

Qizig‘i shundaki, o‘sha paytda Mask rasmiy ravishda xonanda Grayms bilan munosabatda ekanini yashirmagan edi. Ular allaqachon bir o‘g‘il va surrogat ona orqali tug‘ilgan qizni birga tarbiyalayotgandi. Demak, Mask deyarli bir vaqtda ikki ayoldan farzand ko‘rgan. Grayms bu haqda matbuotdan bilib qolganini aytdi. Mask unga “Yer aholisini ko‘paytirish” niyatida bo‘lganini aytib o‘zini oqladi.

Ushbu voqeani yashirish uchun Mask Zilisga millionlab dollar to‘lagan, bolaga nisbatan otalik ma’lumotlarini o‘zgartirish maqsadida sudga ham murojaat qilgan. Ammo hujjatlar OAVga sizib chiqqan. Grayms esa nihoyat Mask bilan butunlay ajrashib, 2023-yilda aliment talab qilgan.

Rasmiy ma’lumotlarga ko‘ra, Ilon Mask 4 ayoldan 14 farzandning otasi, biroq The Wall Street Journal’ning yangi tekshiruvi Qo‘shma Shtatlar jamoatchiligini larzaga soldi: aslida Mask vorislarning butun bir “legioni”ga ega bo‘lishga ulgurgan ekan.

Milliarder bugungi kundagi eng muhim muammo sifatida tug‘ilish darajasining pasayishini ko‘rmoqda. U o‘zini pronatalizm tarafdorlari safida ekanini ochiq tan oladi — ular ushbu muammoning siyosiy va madaniy yechimlarini amalga oshirishga intilayotgan kishilardir.

Maskning nechta farzandi borligi aniq emas. The Wall Street Journal’ning yaqin doiralari va anonim manbalari 14 raqami ancha kamaytirib ko‘rsatilgan, deb ta’kidlamoqda.

Jeff Bezos: jurnalistlar tomonidan fosh etilgan xiyonat va juda qimmatga tushgan ajrim

Amazon asoschisi Jeff Bezosning xiyonati 2019-yil yanvarida National Enquirer tomonidan fosh etildi. Nashr uning sobiq Fox News boshlovchisi Loren Sanches bilan bo‘lgan xatlarini qo‘lga kiritdi.

Sanches taniqli prodyuser Patrik Uaytselga turmushga chiqqan edi. Bezos bilan u 8 oy davomida yashirin uchrashuvlarda bo‘lgan, xususan, maxfiy sayohatlar va hashamatli villalarda vaqt o‘tkazgan. Bu vaqtda Bezos Makkenzi Skott bilan qonuniy nikohda bo‘lgani jamoatchilik tanqidiga sabab bo‘lgan

Ajrim jarayonida Makkenzi kutilmaganda o‘zini og‘ir va vazmin tutdi. Bezos atigi uch oy ichida moliyaviy kelishuvga erishdi. Makkenzi Amazon aksiyalarining 4 foizini olib, 38 milliard dollarga ega bo‘ldi, biroq kompaniya barqarorligi uchun nazorat paketini Bezosda qoldirdi.

So‘ng 2021-yilda Bezos Amazon bosh direktorligidan ketdi va bu qarorini “yangi loyihalarga e’tibor qaratish” deb izohladi, biroq ko‘pchilik buni jamoatchilik bosimiga bog‘ladi. Uning Blue Origin kompaniyasi ham tanqid ostida qolgan edi.

Uzoq yillik “soddadil va ishchan tirishqoq milliarder” obrazi qulab tushdi. U memlar va kinoyali materiallarning asosiy qahramoniga aylandi. 2023-yilda Sanches ularning romani Bezos hali ajrashmagan vaqtda boshlanganini tan oldi — bu esa holatni yanada salbiy tusga keltirdi.

Ular yaqinda hashamatli to‘y qilishdi, ammo jamoatchilikdagi salbiy kayfiyat hanuzgacha izsiz ketgani yo‘q. Amazonʼning sobiq xodimlari hatto Bezosga nisbatan korporativ axloqni buzganlikda ayblab sudga murojaat qilishdi.