IT Park 16 ёшида frontend-дастурчи бўлиб ишлаётган мактаб ўқувчиси ҳақида ҳикоя қилди 

IT Park 16 ёшида Моhirdev компаниясида frontend-дастурчи бўлиб ишлаётган мактаб ўқувчиси ҳақида ҳикоя қилди.

Усмонов Алишер Бухоро вилояти Жондор туманида туғилган. Ҳозирда тумандаги 31-сонли мактабнинг 9-синф ўқувчиси.

1,5 йилдан буён Моhirdev компаниясида жуниор frontend дастурчи сифатида ишлаб келмоқда.

IT-соҳасига бўлган қизиқиш дастлаб Android қурилмалар учун ишлаб чиқиладиган иловаларни ўрганишдан бошланган. Шунингдек робототехника ва иловалар ясашга бўлган интилиш ҳам дастурчи бўлишга туртки бўлган.

Алишер дастурчиликни ўрганишни бошламоқчи бўлганда ўқув курсларини топиш бироз қийинчилик туғдиргани, онлайн дарслар эса амалиёт ўрнини боса олмаганини қайд этди.

Дастурчиликка кириб келганига кўп бўлмаган бўлса-да, у охирги 6 ой ичида 3 та йирик лойиҳани муваффақиятли тамомлаган ва ўз ишини давом эттириб келмоқда.

Ҳозирда барча дастурчилар сингари бирор масала юзага келганда унинг ечимини топишда қийналиши ва буни ҳал этиш учун кўпроқ тажриба тўплаши кераклигини айтиб ўтди.

Алишер бунда жамоа билан кўпроқ ишлаш кераклиги, сениор дастурчилар билан мулоқот қилиб, уларнинг ишлаш тартиби ва масалани ечишда қандай усулларда фойдаланишини ўрганиш зарурлигини таъкидлади. Унинг ойлик даромади 300 доллардан бошланади.

Келажакда Google, Amazon, Uber каби йирик компанияларда ишлаш билан бир қаторда, ушбу соҳага ихтисослашган ўзининг шахсий компаниясига асос солишни орзу қилади.

Алишер ўзининг мисолида иштиёқи бўлган ҳар қандай инсон IT мутахассиси бўлиши мумкинлигини кўрсатиб бермоқда. Асосийси — интилиш, меҳнат қилиш ва ўрганишга бўлган қизиқишдир.