2022-yilda Toshkentda o‘rtacha ijara narxi 34,6 foizga oshdi
O‘zbekiston poytaxtida dekabr oyida ijara narxlari qanday o‘zgargani ma’lum bo‘ldi. Bu haqda “Daryo”ga Iqtisodiy tadqiqotlar va islohotlar markazi xabar berdi.
Toshkentda uy-joy ijarasi narxlarining o‘zgarishi
Poytaxtda dekabr oyida ijaraning o‘rtacha narxi deyarli o‘zgarmadi va 1 kvadrat metr uchun 9,9 dollarni tashkil etdi.
Eng yuqori ijara narxi Shayxontohur (1 kvadrat metr uchun 13,3 dollar), Yakkasaroy (12,2 dollar) va Yashnobod (10 dollar) tumanlarida qayd etildi.
Nisbatan arzon ijara narxlari Uchtepa (8 dollar), Sergeli (7 dollar) va Bektemir (7 dollar) tumanlarida qayd etildi.
2022-yil boshidan buyon Toshkent shahrida ijaraning o‘rtacha narxi 34,6 foizga oshdi.
Uy-joy ijarasi bo‘yicha yil boshidan buyon eng yuqori o‘sish Olmazor (57,6 foiz), Bektemir (50 foiz) va Yashnobod (50 foiz) tumanlarida qayd etildi.
Prognozlashtirish va makroiqtisodiy tadqiqotlar instituti (PMTI) ekspertlariga ko‘ra, “Oybek”, “Toshkent”, “Minor”, “Buyuk ipak yo‘li” metro bekatlari atrofida va Nukus ko‘chasi bo‘ylab joylashgan, yaxshi ta’mirlangan xonadonlar uchun 1 000 dollardan yuqori ijara narxlari taklif qilinmoqda.
Chilonzor va Yunusobod tumanlarida ijara narxlari nisbatan pastroq, aniqrog‘i ta’mirlangan xonadonlar uchun asosan 400-600 dollar atrofida ijara narxlari taklif etilmoqda.
O‘rtacha ta’mirlangan xonadonlar taklifi nisbatan kamroq bo‘lib, ular asosan Chilonzor va Yunusobod tumanlarida, shuningdek, Mirzo Ulug‘bek shoh ko‘chasi bo‘ylab taklif etilmoqda. Bu yerdagi xonadonlarning ijara narxi asosan 300-800 dollarni tashkil etadi.
Ta’kidlanishicha, ijaraga beriladigan qimmat segmentdagi xonadonlar odatda vaqtinchalik ishlash maqsadida kelayotgan chet el fuqarolariga taklif etilyapti va ular qulay infratuzilmaga ega, transport qatnovi yaxshi va oziq-ovqat do‘konlari yaqin bo‘lgan hududlarda joylashgan.
Nisbatan arzon segmentdagi xonadonlarning ko‘p emasligi va asosan ikkita tumanda taklif etilayotgani ijara bozorini rivojlantirish zarurati borligini yana bir bor ko‘rsatadi.
