Germaniya hukumati Rossiyaning ehtimoliy hujumi munosabati bilan yillik mudofaa budjetini hozirgi 86 milliarddan 162 milliard yevroga oshiradi. Bu haqda Bloomberg xabar berdi.
Hukumatning yuqori martabali mulozimiga ko‘ra, bu miqdorga 2029-yilgacha bosqichma-bosqich erishiladi. Jumladan:
- 2026-yilda harbiy xarajatlar 118 milliard yevroga,
- 2027-yilda 130 milliard yevroga,
- 2028-yilda esa 146 milliard yevroga yetishi ko‘zda tutilgan.
Ushbu mablag‘dan har yili 9 milliard yevro Ukraina uchun Rossiyaga qarshi kurashda yordam sifatida ajratiladi. Hozirda Germaniya mudofaaga yalpi ichki mahsulotning 2 foizini sarflamoqda. Agar summani deyarli ikki baravar oshirishni hisobga olsa, yangi ko‘rsatkich YIMning 4 foiziga teng bo‘ladi.
Germaniya kansleri Fridrix Mers Rossiya tahdidiga qarshi turish uchun harbiylarni “Yevropaning eng kuchli armiyasi”ga aylantirishga va’da bergan edi. Yil boshida Germaniya hukumati mudofaa sohasida qarz olish cheklovlaridan voz kechib, harbiy xarajatlarning misli ko‘rilmagan darajada o‘sishiga yo‘l ochdi.
Iyunda mudofaa vaziri Boris Pistorius qurolli kuchlar soni zaxiralar bilan qo‘shib hisoblaganda 460 ming kishiga yetkazishilishini aytdi. Hozir Germaniya armiyasida 183 mingga yaqin faol harbiy xizmatchi bor.
2024-yilda Germaniya armiya uchun qurol sotib olishga 31 milliard yevrodan ortiq mablag‘ sarflagan. Jami 12 mingga yaqin shartnoma tuzilgan, havo hujumidan mudofaa vositalari va o‘q-dorilar ustuvor ahamiyatga ega bo‘lgan.
Izoh (0)